【2021 07 11】是日新聞精選 ＋ 短評 (Patreon)

01，北京打壓 cryptocurrency mining，其實唔係新聞。但過去一個週末，見到唔少類似嘅報道；但佢哋又偏偏全部都信，北京因為「十四．五」講過要 2030年前，達到 carbon neutral，所以出手。

02，「氣候變化，人類存亡危機。」你真係信？當然我唔係話人類唔需要進步。但假如問我，燃燒石化能源（煤、石油、天然氣等），最大問題係呢啲燃料始終有用完嘅一日，其次就係 efficiency 好低。

03，但以石油為例；自上世紀 1960年代起，一直都有唔同嘅 Peak Oil Theory。最初嘅版本話係 2000 年；當然最終係不斷發現新嘅儲藏。呢個移動籠門就一直移動，最新嘅預測係 2019 到 2040 年不等。煤、天然氣，亦都一直有人估計幾時供應見頂，但始終係 inconclusive。

04，結論係，地球比我哋多數人想像中要大好多，好多。離開香港生活嘅朋友，久不久有去下 road trip 就會明白，地球無人住嘅地方，多過有人住；好多呢啲鳥不生蛋嘅地方，又可能有好多天然資源。

05，當然，最新嘅主旋律，已經唔係供應會唔會有日見頂，而係因為燃燒石化燃料做成嘅氣候變化；但呢個主旋律嘅霸道，係連提出質疑都唔可以，會畀人叫 denier。

06，呢種「我掌握了唯一真理」嘅態度，其實非常之咁唔科學。假如人家提出嘅論點，係可以用證據去推翻，即係屬於科學嘅範疇，咁點解唔畀人講呢？假如人家嘅論點唔屬於科學範疇，呢個叫做個人意見；發表個人意見嘅自由，底線又係乜嘢呢？意見一定要建立於事實之上？如果係咁講，呢個世界係唔係連宗教都唔可以存在？

07，大家知唔知有乜嘢係綠皮紅心？表面上為咗地球環境，但心底裡係反市場反資本主義嘅，花名叫「西瓜」。

08，千祈唔好誤會，我唔係講人類唔應該為保護環境要出一分力；我質疑嘅係兩個問題：（一）你信政府做嘅嘢，真係為咗大自然？（二）你信政府做嘅嘢，真係有效？

09，「係唔係都質疑政府，你仲有冇第二樣？」其實，你就當呢個係 Pascal's wager 嘅逆向版。Pascal's wager 嘅意思係，信唔信有上帝，當賭一鋪；如果你唔信有上帝，但最終真係有，代價係要落地獄。但信上帝存在，代價亦只係做個好人。

10，Simon's wager 嘅問題就係：唔信政府嘅代價，其實係無乜；但錯信任何一個唔應該信嘅政府，代價可以有幾高，香港人自然心裡有數。

11，假如真係信北京禁止 bitcoin mining 真係為咗減少碳排放，其實好自然會諗：「點解唔用水力電去採礦？」早幾日先見有報導話 New York 有個地方叫 Mechanicville ，呢度有一座由十九世紀已經開始運作嘅水力發電機 。2021 年起，呢間已經主要係做博物館嘅發電廠，將啲電用來 mine bitcoin，賺得多過放上電網去賣。

12，其實，中國好多礦場，一早都係用水電。

13，不如我又試吓解釋北京嚴打 cryptocurrencies，尤其係 bitcoin mining 嘅原因：當電價受管制，電力公司又從唔同嘅渠道得到國家補貼，採礦，本身就係搵國家著數嘅行動。而且得到嘅 bitcoin，國家完全控制唔到，更加可以用來繞過國家金融防火牆。等到今日先至出手，其實算係遲㗎喇。

14，自從過去呢兩個月，大陸話禁 cryptocurrencies，唔單止 bitcoin，全線 cryptocurrencies 價格都受壓。但真正 HODL 嘅信徒（Hold On for Dear Life）就會話：「震散晒啲機會主義者，就見底㗎喇。」

15，講開能源經濟，我又推介早兩個星期前 ZeroHedge 上面見到嘅呢篇 How Energy Transition Models Go Wrong

16，雖然我唔係完全認同呢個作者嘅睇法，但都先好簡單咁總結人家嘅睇法：人類經濟發展，首重能源供應，而且要又平又 scalable；未來嘅挑戰就係搵出新嘅能源替代。

17，太陽能、風能、水能，其實當中以水能最正路，但始終有一定嘅地理限制。如果從一個好宏觀嘅角度去睇，以上呢三種能源，其實都係太陽能；點解有風？因為大氣層嘅空氣，唔同地方，唔同高度，有溫差；溫差嘅出現，因為地球會轉，太陽就只可以曬到一面。水能，因為水向低流，但點解高處有水？因為太陽曬囉。

18，有冇唔係太陽能嘅能源？有，一曰地熱，二曰核能。其實有啲國家，例如冰島，以人均計係地熱大國。聰明嘅你都應該諗到，冰島亦係 bitcoin 大國；估計地球有 8% 嘅 bitcoin 產自冰島礦場。

19，最簡單直接又技術成熟嘅低碳能源，係核能：「會唔會好危險呀？」搭飛機危險啲，定馬路上踩單車危險啲？我可以好肯定咁答你， 馬路上踩單車危險啲。不過，空難嘅場面好震撼，所以有更多人覺得搭飛機危險啲。

20，當然，核能嘅問題，除咗核電廠嘅安全，亦都有核廢料嘅處置，但都係個句，核能嘅技術，相對其他任何新能源都更成熟。最終，風險計算，永遠都係 optimization 而唔係 minimization。如果話驚氣候變化多啲，咪想辦法更安全咁用核能囉。歐美目前約莫三成嘅電力來自核能，中國就 5% 都唔到。

21，相反，目前中國仍然有 65% 以上嘅電力來自煤。如果大家要個 benchmark 參考：美國煤電比例唔到 20%，西歐應該可以 2030 年完全棄煤。

21，最後，畀多個問題大家估吓：邊個係地球第一產煤大國？