【2021 07 14】是日新聞精選 ＋ 短評 (Patreon)

01，白宮放風，話想同中共搭建一條專線，即係所謂嘅 Red Phone 。

02，冷戰時期，美國同蘇聯其實都有類似安排。但所謂 Red Phone，並唔係大家想像中，JFK 攞起枱面個電話，然後話：「Khrushchev, tell your people not to mess with us！」Red Phone ，又或者 Hotline，最初係電報，後來就係 Fax，依家就當然係 email。歷史亦都證明，Mutually Assured Destruction 以外，更重要係雙方都好清楚見到對方嘅一舉一動。冷戰時期美蘇設立 Hotline，目的係避免另一場世界大戰，尤其係有核武嘅世界大戰；但其他嘅意識形態之爭，以及各地小規模嘅武裝衝突，係會繼續。

03，所以，當 Kurt Campbell 話中美雖然有 hotline ，但試過打無人聽（We do have a hotline. It's known to have, the couple of times we've used it, just rung in an empty room for hours upon hours,）大家應該 take it figuratively；即係佢講緊，中美嘅溝通，至今都係好單向，美方（至少呢一屆政府）有試過向中方傳遞消息，不過中方從來都無作出回應。

04， 所以，你再講一百次話目前唔係冷戰 2.0 都無用。

05，如果大家未有時間睇尋日寫起嘅【比較政治學101】法西斯是如何煉成的  ，請容許我好簡單咁講：「從 Barrington Moore Jr 嘅分析，社會由古代走向現代，有三種模式：Liberal Democracy，Fascism 同 Communism。共產主義社會崩潰之後，留低嘅爛攤子好易會變成法西斯；經濟發達，但如果只係因為由上而下嘅驅動，社會唔一定出現一個廣泛嘅小資本階級同文化，出現唔到一個自由民主政策，最終都係好似十九世紀末、廿世紀初嘅日本同德國咁，變成軍國主義法西斯。」

06，意識形態唔同嘅國家，係唔係可以和平共處呢？當然，我唔係天真到 imagine there's no country 喇。但實情係鬥還鬥，底線係唔好再犯前人嘅錯，動真格。扮打交，對雙方都有好處。詳情可以參考返《1984 》。

07，另外，Reuters 轉述 FT 獨家報道，白宮放風今個星期對在華嘅美國企業發出警告，叫佢哋小心啲，因為北京可能會以：「制裁去反制裁」。同時亦都叫在華美國企業，小心處理香港同新疆人權問題。

Biden to warn U.S. companies of risks of operating in Hong Kong - FT | Reuters 

08，綜合以上兩宗新聞，美國嘅立場好明顯就係要「維持現狀」；最低限度係唔好引發任何武裝衝突，呢個亦似乎係中共嘅底線。

09，至於中共，其實只係 Kurt Campbell 唔踢爆，但我又試吓用人話解釋一次：「中共其真所謂嘅外交，只係做畀佢哋自己睇；又或者做咩中國人睇。」

10，戰狼又好，Global Times 又好，所謂外宣其實都仲係內宣。自古以來，外交都係禮部嘅工作，禮部就係過去嘅 Department of Propaganda。

11， 自從大明、大清，一直都無意思要從外交同其他國家達到任何共識。一係就完全按照天朝嘅意思，萬國來朝；來朝嘅國家，自重重有賞。最重要係畀面天子，得天子可以用最低成本，繼續統治幾億人。

12，再次誠意推薦大家去讀卜正民嘅 Great State；呢本書用十三個片段，串連起成個現代中國嘅國際關係思維，畀讀者好多思想空間。當然，提高閱讀嘅趣味，可以配埋呢篇導讀 【TL；DR】Great State - China and the World 

今日分享咁多先；順祝

處變不驚