經濟的莫須有罪 (Patreon)

= = = 我是分隔綠 = = = 

【最新功能】語音版！更佳體驗，就梗係去 unsubject.me 喇！各位已經自動登記成用戶，用返呢度嘅 email 就可以登入。🙏🏻

= = = 我是分隔綠 = = =

莫須有呢個罪名，從來都係政治檢控。

01，繼「精神鴉片」之後，最新被打壓對象係半新股奈之雪茶。觀乎近來嘅連串執法行動，擺明就係針對新上市嘅企業；至於乜嘢金融安全、網絡安全，甚至食物安全等等理由，睇怕都只係莫須有。

Why it might be good for China if foreign investors are wary ｜FT

02，呢篇 FT 嘅評論，觀點都值得去思考吓。作者話，外資不停咁買中國嘅金融資產，會造成對人民幣嘅需求，從而令到大陸中央政府陷於進退維谷嘅處理。假如畀人民幣升值，就會打擊出口。

03，如果唔係就要進行干預，代價就係透過國有銀行，向市場沽出人民幣，買入外匯。幾家國有銀行，已經買入超過一萬億嘅外匯，而且主要都係過去兩年嘅事。而銀行嘅資產負債表膨脹，最終又會導致國內嘅信貸膨脹。

04，呢篇文章嘅作者都有講，其實除咗人民幣升值同沽出人民幣，仲有第三個方法，就係大舉向外投資，賣返人哋嘅資產。

05， FT 篇文嘅理論基礎，其實係扎實嘅，但最少忽略兩個問題。一係目前大陸都似乎要放寬少少銀根喎，時機上呢輪嘅雷厲風行，會唔會有少少落差呢？

06，其次係過去十幾廿年來，早就有呢個外匯收支不平衡嘅壓力；一直都話要收購戰略資產，例如十幾年前，幾桶油周圍買嘢。但同時北京又怕變相走資，所以乜都要中央統籌，最終就有一帶一路呢個「輸出產能」嘅政策。

07，近兩年因為國際局勢逆轉，中共借一帶一路去消化外匯收支不平衡嘅計劃受阻，都確係事實。話說回頭，呢啲中央統籌嘅「消化外匯收支不平衡計劃」，往往都係效率極低，又好多過水濕腳嘅情況。

08，當然亦唔可以排除，過水濕腳嘅機會，係刻意安排。做官如果唔可以養活全家幾代人，試問為乜要冒咁大風險去做官呢？

09，但係咪真係怕外匯收支不平衡就走去打擊新上市嘅公司呢？我直覺呢個理由有少少迂迴囉。中共似乎唔介意市場對人民幣有強勁嘅需求，亦唔似擔心物價通脹；畢竟前者係你要幾多就印幾多，後者呢個政府亦慣咗用行政手段去操作。

10，假如我無推論錯嘅話，呢一輪嘅刻意嘅打壓，係針對某啲既得利益團體，多過係為咗糾正經濟結構嘅問題。