後現代三國演義 (Patreon)

敵人嘅敵人，未必一定係朋友；敵人嘅朋友，亦唔一定要做敵人。

01，1953年史太林去咗見列寧，赫魯曉夫就開始治唔掂毛澤東。之後，毛澤東借反蘇修剷除中共黨內嘅其他勢力。歷史裡面，新政權好多時都會出現類似嘅內鬥；但好似中共咁荒誕，拖延咁長時間嘅，就比較罕見。

02，毛澤東同赫魯曉夫交惡，最初都只係姿態上嘅矛盾。一直要到文革爆發之後，先至完全反面。之後 1969 年珍寶島事件，可以話係中蘇關係低點。亦咁啱呢個時候，尼克遜就任美國總統；佢見有機可乘，就搵駐波蘭領使去同當地嘅中國領使探路。餘下的，都是歷史。

03，中美關係正常化，代價就係放棄台灣。當年呢一著，究竟有幾大實際意義？好難講，因為歷史沒有如果。但我更加相信，其實換咗其他角色，國際關係嘅發展唔會有好大分別。

04，講返呢段日子，因為見到 Foreign Affairs 有篇評論，觀點都幾破格獨到。作者 Charles Kupchan 話中俄關係表面緊密，但其實暗藏矛盾；尤其一帶一路都觸及到唔少俄國周邊嘅地區，中國嘅影響力，多少都對俄國構成威脅。

The Right Way to Split China and Russia | Foreign Affairs 

05，更重要係今時今日嘅中國，各方面都超越俄羅斯好多。事實上，俄羅斯仲可唔可以算係「超級大國」呢？ Kupchan 認為美國可以借俄羅斯去牽制中共，重點在於要放低敵對嘅態度。

06，雖然中、美、俄三國之間，明顯互相都有一定矛盾，但要中俄關係轉差到好似上世紀六、七十年代嘅狀況，就似乎遙遠咗少少。

07，中俄最大嘅共同利益，就係佢哋各自可以維持目前嘅政治局面，尤其係版圖嘅控制。雖然去到廿一世紀後現代社會，但對極權統治者來講，失去領土等於話畀人知自己係無牙老虎。另外，就當然係對國內嘅絕對控制。

08，中俄站在同一陣線，因為處境相似。另外，兩國嘅統治者都要訴諸一定嘅民族主義。呢個大前提之下，叫美國放低敵對嘅思維，無問題，但咁樣做係唔會改變呢兩國嘅處事態度；因為佢哋嘅外交，從來都係做畀自己人睇。

09，另外，Heritage Foundation 嘅 Dean Cheng 呢篇，對 Biden 嘅外交策略就更加唔客氣。雖然 Heritage Foundation 親共和黨就已經唔係秘密，而且佢哋近年好鷹派，但 Dean Cheng 分析 Biden 嘅對華外交太過斯文，又真係講得好中。例如話之前阿拉斯加會議，目的係乜？結果咪畀中方自我陶醉一番，然後，便沒有然後。

Sherman's China Visit was a Quiet Disaster | Foreign Policy 

11，既然講開同中共嘅外交談判，唔爭在介紹返我自己早幾個月寫嘅一篇文章。呢篇一半講中式談判技巧，另一半其實都係從簡單嘅博弈論去睇台海嘅問題。坦白講，我向來認為外交嘅真正意義不大，就好似不斷嘅嚴正聲明，你覺得對方會真係因此改變立場咩？再強調多一次；外交，係做畀自己人睇。中國如是，俄羅斯如是，美國亦如是。

中式談判技巧 | Unsubject