某日，我執到一把絕世好劍 (Patreon)

三十年代一次打機嘅奇異經歷，令我對權力有切身嘅體會同反省。

而我只不過玩咗一個星期嘅新手

當時，我都只係殺吓 goblin，連一個木盾都未儲夠錢買；右手得支匕首，左手空空如也。

「地上面有啲閃閃吓嘅嘢，你去唔去睇吓？」呢個練功嘅地方，我玩咗都好多個鐘頭，但呢個訊息，都係第一次見。

「搜尋。」「你搵到一把劍。」「執起把劍。」

「噫，點解自動裝備咗把劍？」「試吓轉去右手先。」「點解唔得嘅？」

「你知唔知手上呢把係乜嘢？」忽然間，有把聲音同我講嘢。

「唔知呀？可唔可以話我知，點樣將把劍轉去右手？」

「我哋嘅規矩係，任何人一執起呢把 Slayer，就成為佢嘅主人。劍在，人在；除非係被其他人殺死，把劍都唔會離手。仲有，Slayer 嘅主人見到任何有生命嘅嘢，都不受控咁去發動攻擊；佢去到邊，全世界嘅人都會知。祝你好運。」

就係咁，我成為被命運選中嘅人。

----- 我是分隔線 -----

上世紀九十年代，internet 仍然係少數人嘅玩意，有人鍾意去 newsgroups，我就冷門啲，鍾意玩 mud，multi-user dungeon，亦即係今日嘅多人線上遊戲嘅元祖。

以上所講嘅經歷，真人真事。對白當然唔係廣東話，而係英文。諗返轉頭，與其話我玩遊戲，不如話個遊戲玩我。背後操作呢個遊戲嘅人，從上帝視角去睇我哋，應該幾過癮。

----- 我是分隔線 -----

用左手執起一把全個遊戲裡面最厲害嘅兵器，最初嘅感覺，係可惜。如果命運能選擇，點解我唔可以用右手執起把劍？用左手，攻擊力減半呀！

但諗咁多都無意思，因為好快我就知道，莫講話用左手，用隻腳執起把劍，我都已經係遊戲裡面，數一數二嘅高手。

我一路見人殺人，見獸殺獸。殺呀殺，一路升級；越升級，就越打得。

既然規矩係邊個殺咗我，就可以得到呢把絕世好劍；遊戲裡面玩得耐嘅高手，個個都對我手上有呢把劍虎視眈眈。

單打獨鬥，佢哋未必係我嘅對手，但如果幾個夾埋呢，或者都有可能打得低我。所以，佢哋好快就聯合起來，一直追殺我；而我一邊逃走，就一邊濫殺無辜，增強功力。

其實一開始玩嘅時候，我都只係諗住打發時間，又或者識吓朋友，殺吓怪獸，無諗過要一邊被人追殺，另一邊又條件反射式咁去見人就打打殺殺。

有好幾次我同其中一啲玩得耐嘅高手講：「我玩夠喇，不如約個地方，我盡量等自己少啲血，你試下殺我；假如你殺到我，把劍就傳畀你。」

結果係，無人相信我嘅說話。我估佢哋以為係一個局，引佢哋分開去逐個擊敗。事實上，過去幾個星期，佢哋追殺我嘅時候，我偶爾都會錯手殺死佢哋其中一、兩個，將佢哋嘅裝備同錢都據為己有。

但問題始終係，我當日執起呢把絕世好劍，用左手，攻擊力減半。

如是者，我玩多幾日，感覺到非常之無癮，就無再玩。

最終把劍嘅下落？我唔知。呢個遊戲，過一段日子無登入，角色會被消除。或者，當我嘅角色被消除之後，真正嘅幕後玩家，又會搵另一個「被命運選中的人」，去展開另一波嘅爭逐。

----- 我是分隔線 -----

請恕我畫公仔畫出腸。

現實世界中，有啲人，會好似我玩 mud 嘅經歷一樣，執到把劍；呢把劍，叫做權力。

未掌過權嘅人，會希望得到權力。掌權嘅人，感覺應該係寂寞。但亦有人明知權力嘅本質，仍然窮追不捨，就好似當年遊戲裡面追殺我班資深高級玩家。可能對佢哋來講，呢個先係遊戲好玩之處。

“Nothing discloses real character like the use of power. It is easy for the weak to be gentle. Most people can bear adversity. But if you wish to know what a man really is, give him power. This is the supreme test.

以上一段說話，後來被簡化成：to test a man's characters, give him power ；以上呢一段說話，出自作家 Robert Ingersoll ，本來係要來讚揚林肯，但亦都反映咗基督文化對美國政治嘅影響：「權力既然唔屬於個人，所以拎得起，就要放得低。」

獵犬終須山上喪，將軍難免陣前亡。迷信權力，自然會日夜提防自己被更強大嘅對手征服。所以，真正嘅智慧嘅表現，唔係日思夜想如何去獲得權力，而係點樣可以和平非暴力咁移交、分散權力。

歷史其實早有答案。偏偏某神奇國度手持絕世好劍嘅人，從來都唔相信自己單純被命運選中。呢班處心積慮嘅資深高級玩家，相信最終掌握一切嘅，就係自己。