駭客 UNC215 借刀 (Patreon)

最終又點樣被人識穿？

首先簡單交代事件背景：美國網絡安全顧問公司 FireEye 指，由 2019 年起多宗疑似由伊朗駭客針對以色列嘅網絡攻擊，其實係由一班中國駭客策動。

UNC215: Spotlight on a Chinese Espionage Campaign in Israel 

駭客點樣扮伊朗人？乜中國同伊朗唔係盟友咩？呢啲網絡攻擊又為咗乜？呢班駭客最終又點樣畀人揭發？

首先，係被攻擊嘅對象。除咗政府、仲有科技公司、電訊公司等。駭客會留低證據，包括用 Farsi 留言，用伊朗駭客常用嘅工具等，希望令人以為係由同以色列關係緊張嘅伊朗嘅駭客策動攻擊。

美國嘅網絡安全顧問公司 FireEye 同以色列軍方聯手，掩破一宗疑似「借刀」事件。報告話，駭客留低嘅線索，有啲都好著跡，例如檔案嘅名、路徑，會用 Iran 做名。但與此同時，又好小心咁避免有其他線索追蹤得到佢哋嘅來源。

FireEye 稱呢隊駭客做 UNC215；佢哋活躍中東、亞洲，用來用去都係類似嘅手法，所以極容易被識破。正所謂上得山多終遇虎，同一套路用得多，就好易比人以對比嘅方法，去搵出邊個係真正嘅黑手。事實上， UNC215 甚至連伊朗政府嘅電腦都入侵過。

呢種刻意留低證據誤導調查工作嘅手法，英文叫 misattribution。通常 misattribution 嘅目的在於聲東擊西，等人以為策動攻擊係為咗一件事，但實際上真正目的係另一個唔起眼嘅地方。

2018 年南韓平昌冬奧，遭遇一隻叫 Olympics Destroyer 嘅 Malware 攻擊；有人話係俄羅斯扮北韓人，又有人話係大陸人扮俄羅斯人扮北韓人。

The Untold Story of 2018 Olympics Destroyer Cyberattack 

揭發 UNC215 呢宗借刀事件前兩星期，美國極罕有咁聯同五眼聯盟、北約、日本等國家，聯合出聲明指中國國安部門涉及多宗網絡襲擊，包括今年 Microsoft Exchange Email 被嘅大規模攻擊。北約同五眼聯盟，都係軍事聯盟，換句話說，事件真係被提升到國家安全級別。

中國外交部例牌回應，話列強有口話人冇口話自己。今次 UNC215 事件都一樣，話無證據係中國駭客；再講多幾句，睇怕又會搵返 Snowden 來講。天朝嘅外交部，來來去去都係幾句。

講開中國嘅外交，有篇報道都值得分享；我見啲台灣、海外華人圈子，都有人討論呢件事。話說一帶一路研究所副所長儲殷指戰狼外交係「內宣當外宣」；佢仲話：「以前識英文就可以講好中國故事，依家你哋英文講得咁好，但人家就唔明你哋做緊乜。」

Wolf vs panda: is China at a crossroads over how to spread its global message? | SCMP 

報道又話，儲殷嘅發言，最早係由新加坡聯合早報傳載，但之後外交部壓力之下，聯合早報刪除報道。搵聯合早報洩露機密，點會係意外？

早兩個月，習近平自己都話要做到中國「可信可愛可敬」，但點解戰狼好似都收唔到手？另外，以上報道亦都引 2017 年經濟學人嘅一篇偵查報道，指中國每年外宣用過百億美金；言下之意就係戰狼幾條友就咁將好幾百億建立出來嘅形象摧毀。

Is China’s New U.S. Ambassador a ‘Wolf Warrior’—or a Fox? | Foreign Policy 

另外，剛上任嘅中國駐美大使秦剛，雖然有人話佢係第一代戰狼；我睇咗佢個 twitter 一段日子，暫時好似都幾克制，一啲都唔似咁進擊。

多數人所認識嘅戰狼，例如華春瑩、趙立堅等人，其實都係北京發炮。之前都好勇猛嘅耿爽，派去聯合國之後，都低調咗。有理由相信，佢哋嘅戰狼 mode，都係角色扮演；出到去，就係另一個 mode。

如果明白到，中國嘅外交，係做畀中國人睇；用呢個邏輯去理解，一切都通順晒。