Twitter 上的塔利班 (Patreon)

01，《華盛頓郵報》指自 2010 年起，塔利班已經用 Twitter，2014 年就開始用 Telegram。 2016 年攻佔北部一個重鎮之後，幾分鐘內已經有影片流出。

02，「嘩，仲叻過某個自稱國際金融中心嘅政府喎。」又話說回頭，用乜嘢工具，點樣用，最終都係要睇目的係乜。某國際金融中心嘅政府，其實唔需要打輿論戰。甚至更正確啲咁講，某國際金融中心政府嘅行事準則，第一個考慮係「有冇鑊氣」；玩 social media 咁多變數，就梗係多一事不如少一事。

03，以上所講嘅「鑊氣先決」概念，唔止係講最高決策者，由上而下嘅官僚文化亦如是，其實，亦唔只係政府，任何大機構，或多或少都有呢種機構文化。偶爾有一、兩個特殊嘅例外，例如「清潔龍阿德」「大嘥鬼」之類，一來因為相關部門嘅潛在「鑊氣」比較細，二來就係呢啲政策範疇從來都係制度裡面，最經常被用作建立政治議題，例如清潔香港。

04，俱往矣。「有乜嘢衰過事事只係考慮「鑊氣」嘅政府？」就係一個連「鑊氣」為何物都唔知唔理嘅政府囉。所以，逆向思維咁去諗；政府唔識 spin ，唔玩 propaganda，未必係壞事。一個太平盛世嘅社會，其實只要人民信幾件事：一，遇到不公義，要信制度，唔好私了。二，做壞事，一定會有後果；個天唔收你，個制度就會替天行道。至於何謂善，何謂惡，標準隨時代而變，但基本上呢兩點，就係所有政治宣傳嘅必要嘅元素。

05，塔利班又做乜要玩 social media 呢？首先，阿富汗嘅大多數人，都係文盲；識英文嘅就更加係極少數，仲要可以上到 social media 係咁貼文貼相貼片嘅，相信都唔會係一般素人。

06，有研究指，呢啲支持塔利班嘅 twitter 戶口，好多都係專業操作；專業，意思係背後操控嘅唔係塔利班前線打仗個班，甚至唔係後方指揮嘅軍官，而係識英文同埋可以廿四小時上網嘅真正鍵盤戰士。

07，呢啲鍵盤戰士，針對嘅係國際社會，亦可以話係一種外交工具。從過去一段日子佢哋所貼嘅內容，似乎要國際社會接受塔利班一定會宣布接管全阿富汗，其他國家可以選擇合作，又或者唔合作；例如中國、土耳其等，都已經擺出個勢，願意接受塔利班政府。

08，塔利班要得到某啲國家接受，但唔代表佢哋會完全跟足普世價值去管治阿富汗。目前歐美各國政府嘅立場好尷尬。假如呼籲各方坐低談判，但實情係原阿富汗政府都唔知點傾，有乜好傾，甚至分裂成唔同派系。

09，阿富汗其實已經有民主選舉，但點解最終都仲係以內戰解決問題？最簡單嘅答案係：塔利班知道，佢哋無可能透過選舉，贏到絕對嘅控制權。事實上，阿富汗嘅地區格局，山多，沙漠多，人口分佈極不平均，呢種情況形成嘅「城鄉差別」，本來就已經不利發展選舉政治。

10，呢種由地理因素構成嘅矛盾，莫講話發展中國家，就連美國都一樣要面對。美國憲制嘅設計，好多程度就係為咗平衡呢啲因地域差異所衍生嘅矛盾。

11，至於中國，處理呢個根本嘅統治問題，就係以戶籍制度，透過限制人口嘅自由流動，避免因個別地區人口急變導致社會矛盾，威脅大一統嘅基礎。

12，講返阿富汗，除咗地理上嘅人口分佈不均，南北兩邊，亦分別有唔同嘅種族。近巴基斯坦嘅一邊，主要係普叶頓（Pashtuns），北邊少少，人口比較集中大城市嘅就更多塔吉克（Tajiks）、哈扎拉（Hazara）、烏茲別克（Uzbek）。

13，建立現代文明社會，首先係要有能力去建立一個共同嘅身份認同。今時今日嘅阿富汗，有好多人嘅身份認同，仍然停留於所屬嘅部落為本；呢種情況下，好難短時間內演變成現代民主社會。或者，呢個先至係阿富汗內戰不斷嘅原因。

14，其實由第二次世界大戰後到 1970 年代，阿富汗有過廿幾年嘅空間去現代化；但似乎廿幾年不足以改變一個社會。就正如美國介入嘅廿年，最終都係失敗收場。

延伸閱讀：帝國墓園與軍閥搖籃

15，雖然塔利班又玩 twitter 又打國際牌，但佢哋始終只係一班手執現代武器嘅部落族長，所以最終都係要將全阿富汗嘅文化，降低到去一個方便佢哋統治嘅水平。換句話講，塔利班唔會容忍知識份子。話就話要奉行伊斯蘭律法，實情係搵個名目去令思想輿論嘅空間變得單一，狹窄。

16，唔同招牌嘅極權統治，其實都係用同一套手法；選舉政治、言論自由、教育等三個環節，一定會被摧毀。然後，就係以公開嘅懲罰，去建立群眾對「善」、「惡」嘅標準。