共富在香港 (Patreon)

港資財閥如何是好？

01，正如之前所寫，所謂第三次分配，並非為咗減少貧富差距。相反，更有理由相信，面對經濟不再高速增長，中共要處理統治體制嚴重膨脹嘅問題。不過，一個根本唔容許公民社會嘅國度裡面，企業又點可以有效咁去自行再分配？結果，最終結果就係，共富，只不過係中共宰割過去因保護主義而養肥嘅壟斷企業。

總加速師的分配再分配 （2021 年 8 月 25 日）

02，香港有唔少自以為好了解國情嘅評論人，例如香港01嘅老闆于品海，又或者明報前主筆阮紀宏就話：「香港既然係國家不可劃分嘅一部份，點解香港嘅財閥唔自動自覺做嘢？」

03，港資財閥，唔可以話孤寒。先唔講 1949 年之前，由七、八十年代起，幾乎所有家族都除咗投資，亦都捐咗唔少學校醫院。當時，北京統戰呢班香港財閥，亦唔係要佢哋嘅錢，只要佢哋肯繼續玩香港呢個遊戲就夠。事實上，財閥亦曾經以為，佢哋對香港真係可以有 say。

04，當年返大陸投資，唔止無乜錢賺，有時都幾勞氣。第一代嘅愛國港商霍英東，晚年都曾經因南沙發展而泥足深陷。佢過身之後，幫佢處理南沙發展嘅何銘思，出版咗一本口述回憶錄，講當地嘅官僚幾咁無規無矩。隔咗廿年之後嘅今日，大陸嘅輿論，經過修正嘅歷史就話霍家囤地謀取千億暴利。

05，其他港資財閥家族，例如新世界同恆基，當年都試過投資大陸中伏。至於誠哥，唔知大家仲記唔記得有個地方叫北京東方廣場呢？以上每個教訓，最低消費都幾十億。

06，當然，上世紀九十年代之後，港資都有繼續投資大陸，尤其基建同房地產。2002 年筆者都上北京做過一個樓盤，地點係朝陽區一間國企工廠嘅舊址。北京嘅一方係萬通，另一邊係老牌英資地產公司。由於呢個係英資重返中國嘅頭炮，所以搵香港人上去做支援。

07，北京萬通派一個三十出頭嘅後生女負責呢個項目嘅總經理；清華畢業，但重點係黨員。由於我哋只係英資地產商嘅 contractor，所以去到北京就梗係同上司周圍 pitch 其他當地發展商，睇吓有冇機會直頭開個北京分公司。因為呢個原因，接觸過潘石屹、張欣等；當時佢哋間公司仲叫紅石。我印象最深刻係當時呢班大陸嘅企業家，個個都係有故事的人；反而我哋呢邊，就個個都係打工仔。我仲好記得潘石屹講「長城腳下的公社」嘅時候個種雀躍；唔係純粹為錢，而係覺得好好玩嘅個種興奮。

08，大陸呢個時期嘅企業家文化，係鄧小平南巡之後嘅產物，亦係經濟高速增長之下嘅產物。假如當年嘅呢種氣氛可以維持落去嘅話⋯⋯對唔住，歷史係沒有如果，事實係呢種氣氛，亦都因為國進民退而漸漸消失。

09，以 perfect hindsight 去睇，胡溫年代嘅轉變其實都非常之大。當然，到習近平時代轉變就更大。但最近一次嘅轉變，一定係 2018 年嘅十九大，好多人以為只係純粹嘅「國家主席永續」，但「深化黨和國家機構改革」都唔可以忽略。

10，雖然好多人都覺得大陸從來都係黨國不分，但事實上黨員唔一定係國家幹部。不過，當黨國嘅分界變得更模糊，結果係本來屬國家機器以外嘅事，都漸漸納入到統治架構之內。又係十九大之後，股份制改革要求企業裡面都要有黨組，好多人睇唔明，仲以為只係「形式主義」。

11，香港嘅財閥會唔會唔知到大陸呢兩年嘅轉變呢？我諗，阮紀宏、于品海都知嘅，甚至利世民都知，幾大家族唔會唔知啩。當然，我心目中，誠哥，就一定係最有遠見嘅一個；如果佢要做選委，一定留個位畀佢嘅。唔做，呢個 message 先係最強烈。

12，好局部咁睇，特區何嘗唔係逐步走入財困？但杯水車薪，就算共晒呢班富，體制嘅臃腫，遲早都會拖垮呢個城市。大陸已經發生嘅事，睇怕香港都只係遲早會發生。甚至，港資財閥一早就「土地共享」；不過似乎成件事，根本唔係為咗求財。

13，我必須強調，香港嘅鬥地主，捐錢都係唔夠。最終係要表示絕對嘅忠誠；好似誠哥咁，唔選，都會畀人話唔畀面，選，又話咁老都仲想有影響力。欲加之罪，何患無辭，聽過未？

14，從前香港，建制、商界有好多線路向北京示忠。過去幾年，呢啲消息嘅流向變得越來越單向，唔透明。一眾跳樑小丑，就只可以用最誇張嘅方法，最不成比例嘅音量，隔空向北京示忠，同時做畀全世界睇，自己好緊貼北京。但久不久亦有誤傳，假傳、分析當消息等。以上嘅轉變，亦解釋咗點解之前反制裁法港官集體炒車。

15，吳秋北走開曾鈺成拖，梁振英擺個勢話自己有機會翻身，呢啲都可能係借資訊不對稱去投機。至於阮紀宏、于品海呢個層次嘅，我相信只屬個人意見，不代表政權立場。

15，「你又憑乜咁肯定北京唔係咁諗？」常識；common sense is not that common, isn't it？我唔知北京點諗，但可以肯定咁指出邊啲講法有矛盾，有邊啲講法不合情理。

16，最後，以下係過去幾個月我寫過相關嘅隨筆，畀大家參考下：

港版鬥地主（一）  （2021 年 3 月 22 日）

港版鬥地主（二）  （2021 年 3 月 24 日）

雙信封裡的惡魔  （2021 年 7 月 14 日）

發展商的困惑  （2021 年 7 月 29 日）