算法推薦服務規管 (Patreon)

網信辦最新法規建議解讀及推測

網信辦發佈《互聯網信息服務算法推薦管理規定（徵求意見稿）》 

01，中國政府管呢樣，管嗰樣，就唔係新聞。正如之前同大家剖析，網信辦係十九大之後其中一個黨國合一嘅機關，全名「國家互聯網信息安全辦公室」，直屬「中央網絡安全和信息化委員會」。總之，好高段數。

02，點解咁高度重視呢個範疇？國家安全？呢個講法，一定正確。但一定正確嘅答案，不但最 uninspiring ，亦都最易令我哋睇漏眼細節中嘅魔鬼。

03，首先，徵求意見稿，亦即係我哋香港所謂嘅「諮詢文件」，開宗明義都話，規管（佢哋話「規範」喇）目的係「維護國家安全和社會公共利益」。又係一定正確嘅，無乜需要補充。

04，具體管乜嘢呢？凡涉及推薦嘅算法應用同服務，包括對針對個人喜好嘅推薦、排序、篩選等，都要管；從字面去睇，唔單係產品搜尋、包括其他一切相關嘅，包括推送訊息等，都管。好表面咁睇，國家要群眾睇乜，群眾就睇到乜。

05，國家要群眾睇乜嘢呢？（第六條）「服務提供者應當堅持主流價值尋向，優化算法推薦服務機制，積極傳播正能量，促進算法應用向上向善。」從 compliance 角度，大陸嘅法律永遠都有好多曖昧不清嘅定義。

06，其實呢條法律，真正「有牙」嘅部份係：「算法推薦服務提供者不得利用算法推薦服務從事危害國家安全，擾亂經濟秩序和社會秩序，侵犯他人合法權益等法律，行政法規禁止的活動，不得利用算法推薦服務傳播法律，行政法規禁止的信息。」（第六條）

07，另外，操縱虛假帳號，影響結果，都唔可以。所以，唔單止係針對平台，而係「服務提供者」。

08，當中，都有關於保障消費者，特別係未成年人；公道咁講，呢部份都相對正路，只不過從 compliance 角度，好多概念好含糊。講開又講，有文化研究指中國屬相對 high context 嘅文化；文字嘅意思，往往要由讀者去自行演繹。相對 low context 嘅文化，例如美國，寫嘅、講嘅人，有更大責任將文字同語言嘅意思，去精準表達。

09，由第二十條開始，主要講「輿論屬性或者社會動員能力的算法推薦服務提供者」；由國家層面，到省、自治區、市等，不但可以罰款，更加可以關閉網站，終止服務。

10，「騰訊、百度呢類公司，一定走唔甩喇。」呢份徵求意見稿上星期五公布，騰訊嘅股價，亦都震咗一震。

11，電商例如京東、拼多多、阿里等，亦點都會受影響。平台收入，除咗係上架、物流，profit margin 最高，應該係幫賣家推銷。「嗱，國家唔係唔畀你做，但又隨時可以要你合規，明唔明？」

12，好多人以為，唔識趣嘅，咪管嚴啲囉。問題係，有權執法嘅，由國家層面到省、自治區、市等，真係要好好管理各級機關嘅聯繫，都真係要用幾多人力物力。建設一個衙門，最緊要係層層都有自己可以彰顯權力嘅機會；所以，大家真係要學嘢。

13，諗返轉頭，好多年前，仍然係思歪做行政長官嘅時候，死推爛推都要開個創科局。我唔知佢係咁了解國情，定係捕風捉影之下，有殺錯無放過。到今日為止，創科局都只係做聖誕老人，周圍派禮物，未識得建立一個「壞孩子」名冊；實行「取諸於民」。

14，另外，之前「反起底法」，我認為只係小菜一碟。特區要符合國情，但凡涉及「安全」呢兩隻字，理論上都要跟到足；嗯，香港可以用到 Google 、 Facebook 㗎喎，唔知幾時有人會有人話為保障消費者，香港都要睇吓呢啲科網巨企嘅 algorithm 呢？

15，另外，唔好忘記，呢條法例唔只管平台，一切服務提供者都係受監管。所以，做 online marketing、social marketing、幫人搞 SEO 等，都自己睇路。