內鬥內行的民族 (Patreon)

唔係每個人都感受到嘅宮廷政治

01，2016 年，大陸又好，香港班建制派又好，都講到電競好有前途。國家教育部仲將「電子競技運動與管理」當作屬於教育與體育嘅一個專業。明年嘅杭州亞運，電競本來係正式比賽項目。

02，當時有個講法，話等啲年青人有個希望，同埋透過代表國家對外作賽，又可以加強民族認同。

03，又，比電競再早少少，大陸資金又一窩蜂去投資電影、製片。當時又有個講法，話建立民族嘅軟實力。所以，萬達走去買 AMC，阿里又走去開個阿里影業。甚至連香港，都有話要整個文化局；當年曾蔭權、曾俊華都扮晒好支持電影業。我有理由相信，其實都只不過係好低調咁畀北京睇，佢哋係緊遵黨嘅路線。

04，但好似忽然間，未成年人一個星期，只有三個鐘頭可以打機。先唔講電競唔電競，我聽過最務實嘅講法係，成個國家嘅年青人都係個幾個鐘頭上網打機，對牆國內聯網嘅衝擊，真係唔講得笑。

05，唔打機，又唔可以追星，連補習都無得去，大陸嘅年青人可以做乜呢？學習黨同國家想佢哋學嘅嘢？準備好同美國作戰？大陸有個鍵盤戰士李光滿，寫咗篇《每個人都能感受到，一場深刻的變革正在進行！》，裡面最主要嘅一段，就咁講：

當前中國面臨著越來越嚴峻複雜的國際環境，美國正在對中國實施越來越嚴厲的軍事威脅、經濟及科技封鎖、金融打擊、政治及外交圍剿，正在對中國發動生物戰、網絡戰、輿論戰、太空戰，力度越來越大地通過中國內部的第五縱隊對中國發動顏色革命。如果這個時候，我們還要依靠那些大資本家作為反帝國主義、反霸權主義的主力、還在迎合美國的奶頭樂戰略，讓我們的青年一代失去強悍和陽剛的雄風，那麼我們不用敵人來打就自己先倒下了，就像當年蘇聯一樣，任國家崩潰、任國家財富被洗劫、任人民陷入深重災難。因此當前我們中國正在發生的這場深刻變革，正是為了應對當前嚴峻而複雜的國際形勢，正是為了應對美國已經開始對中國發動的野蠻而凶猛的攻擊。

06，呢篇出自一個九唔搭八嘅鍵盤戰士，但唔知點解得到國家宣傳機器嘅認可，經各大黨媒轉載。有人話，第二次文化大革命打到來喇。究竟，事實又係咪咁簡單呢？

07，過去兩、三日，我有少少唔知點樣理解大陸嘅情況；兩宗新聞，一單就係限制未成年人士打機時間，另一單就係趙薇事件。尤其係趙薇事件，可能因為涉及知名人士，坊間好多雜訊噪音；當中一定有捕風捉影嘅揣測，但亦唔排除有刻意要混淆視聽嘅操作。畢竟，名利場加金融圈嘅事，大家聽到嘅所謂消息好多都係亂吹，但真相又往往比想像更荒誕奇情。

08，至於打機「限時令」，反而好似無乜懸念。但我亦都唔排除，可以係唔知邊個政治局常委，甚至習近平自己嘅孫仔孫女掛住打機，令佢（哋）主觀咁覺得呢個問題好嚴重，要提升到國家層面去「法治」。

09，據說，當年新加坡禁香口膠，亦只不過係當年一個國家發展部部長鄭章遠覺得，香口膠周圍黐好難清潔，所以認為一了百了禁咗佢好過。酷吏嘅下場，往往都係話畀人知，極權統治之下，剃人頭者人亦剃其頭。八十年代中，鄭章遠服毒自殺身亡，後來李光耀公開讀出佢嘅遺書，同時揭露原來當時新加坡政府已經對鄭章遠進行貪污調查。

10，鄭章遠係唔係貪污呢？無人知；但新加坡就贏得一個清廉國家嘅美譽。另一邊廂，某神奇國度，其實都久不久就有貪官落鑊。各位同學，貧污，永遠都係一個制度問題；既然係制度問題，拉幾個人去祭旗，作用有兩個：「排除異己，同時畀大眾一個國家代表正義嘅想像。」

11，關於排除異己，另一個大家要明白嘅道理係：「異己，又唔一定要係好大矛盾嘅敵人，有時甚至係多少有合作關係嘅伙伴都唔出奇。」點解自己人都要咁殘酷？因為作為一個統治者，必須要向每一個有能力同可能挑戰自己嘅人講：「我無咗你哋邊個都無問題。」所以，專制嘅社會，掌權執政，從來都係一個高風險嘅投機搏弈。

12，某神奇國度，一直都好嚮往新加坡模式。由香港第一任行政長官開始，都已經想香港變成新加坡。但到後來，似乎四個自信之下，甚至連新加坡模式都唔需要，直頭一步跳入北京共識嘅新常態。2017 年十九大之後，呢個趨勢，就更加明顯。

13，但就算話十九大之後，乜都話「國家安全」，但都未去到「每個人都感受到嘅一場深刻改革」。雖然當時已經有人話，集權加個人崇拜，仲唔係好毛澤東？但我嘅歷史知識話我知，個個獨裁者都係呢套手法，見怪不怪。

14，我由當時到依家都仲堅持，呢個世界唔會有真正嘅獨裁者；每個統治者都係靠既得利益者集團所維繫。越強調大權在握，就越係心虛，越係朝思暮想咁權謀政敵以及潛在嘅競爭者。

15，本來，民主選舉最大嘅好處，唔係咩人民當家作主，而係可以將各種政治鬥爭，權鬥，變成用選票解決。當然，民主選舉都要有「守規矩」呢個大前提。好似阿富汗，就係明明有選舉，都寧願選擇透過內戰去決一高下。

16，假如話目前係文革 2.0；甚至乎黨媒，都有唔介意民間有呢個睇法，咁我哋亦不妨用呢套邏輯去分析中共：「一切都係派系鬥爭。」其實當年文革，何嘗唔係毛澤東漸漸被親蘇嘅一派所排擠而失勢，要重新奪權而搞嘅一場大龍鳳？

17，咁，現任國家主席，因乜事要郁邊個咁大費周章？又或者，掉返轉頭去諗，定係有人要佈個局，要去招呼國家主席？資訊嚴重不對稱嘅情況下，我只會話兩個可能都有，而且機會均等。

18，另一個教訓就係，中共話要發展啲乜，又或者打壓啲乜，可以完全唔需要理由；所謂嘅理由，往往都係之後穿鑿附會而成，無需要太認真去考究。反而睇吓邊啲人，點樣從中得利，可能會睇得更清楚。

19，目前大陸嘅流行文化工業，其實都係科網企業嘅附屬；又係不外乎騰訊、阿里、愛奇藝。至於打機，就更加唔在講。我甚至覺得，當年將電競吹到咁大，都係騰訊背後發功。所以，打機限時令同反飯團文化，都係針對同一班既得利益者。

20，早幾日，又有傳汪洋會接任做總書記；好奇心驅使下做啲簡單嘅 desktop research，先發現佢位千金汪溪沙，就係紅杉中國投資合伙人。當然，官二代當中，亦大把人做金融財經嘅；可能呢個只係偶然。但又會唔會其實好多中共權貴嘅家人，多少都有唔同嘅利益關係？直接打唔到佢哋，間接破壞佢哋嘅利益，都可以係一個權鬥嘅方法。

21，中美之爭，可能都唔夠中南洋裡面嘅爭鬥咁激烈。2022 年秋天，就係二十大；到時仲有杭州亞運助興添。到年底又有冬季奧運；所以一早就咁緊張係咪會畀國際抵制囉。

22，都幾有理由相信，過咗 2022 年，好多今時今日大家以為係新常態嘅事，又可能完全唔同晒。就係咁，好似坦丁所形容嘅 ante-inferno，成班人永無止境追逐一面不斷變幻但無意義嘅旗幟，後面就畀毒蜂契而不捨咁追殺⋯⋯

【延伸閱讀】Dante's Inferno | Canto 3