有硬件無軟件的發展 (Patreon)

01，幾十年前，某國搵到一個好偏遠嘅地方，試下另一個經濟模式。「得喎，好似有啲料到喎。」如是者，幾十年來，開吓又多一個經濟特區，開吓又多一個自貿區，開吓又多一個乜乜區，物物區。用當年同一招，究竟可唔可以制度自信咁，建立出金融、科技嘅內循環？

02，唔好忘記，神奇國度當年仍然奉行 hardcore 計劃經濟，行公有制，唔存在私企，無自由市場；開第一個經濟特區嘅時候，做小生意嘅人，好多都係由個體戶做起。仲要呢個神奇國度，有個要來控制人口嘅戶籍制度。呢個經濟特區，真係好多制度上嘅分別。

03，更重要係，深圳呢個經濟特區 1.0 嘅旁邊，就係香港；一個舉世聞名嘅經濟奇跡。之後嘅其他乜乜區、物物區，都及唔上呢個一國兩制嘅元祖，其中一個原因就係因為冇一個好似香港咁嘅地方去發揮協同效應。但過咗好多年，好多人亦唔記得一路走來見過嘅風景。

04，上世紀八、九十年代，由手作仔到山寨廠到成行成市嘅出口工業，既唔係一朝一夕建成，更加唔係閉門造車。

05，當然，經濟特區 1.0 以外，另外長三角一帶嘅發展都唔失禮。甚至從地理角度去睇，長江流域嘅重慶、武漢、南京、上海，先至係全國嘅經濟同人口重心。

06，現代社會，制度比環境重要；因此過去幾十年，令整個神奇國度重心南移。大家如果讀過吓歷史，都應該知道，當呢片土地嘅人口同經濟重心南移，通常都意味南北嘅意識形態好易出現鴻溝。

07，唔同時空嘅處境，唔可以簡單類比。過去兩千年來，南北對峙分裂嘅局面，最長可以幾個世紀，短，亦可以好似南宋咁成百幾年。

08， 自忽必烈 1271 年建立大元，呢片土地大多數嘅時間，都係得一個正統。嗯，點解唔我話係「統一」呢？因為元末明初，群雄割據嘅日子，大大話話都有十幾年。大清覆亡之前，太平天國都打咗十年有多；大清覆亡之後，其實呢片土地上面何嘗唔係再次軍閥割據？之後發展成國共內戰，輾轉又爆發第二次世界大戰，最終真正統一大大話話用咗三十幾年。

Great State: China and the World 

09，五四運動至今超過一世紀嘅民族意識建立工程；中國人呢個身份認同，應該係有史以來，最強烈嘅時期。不過，始終都要將南北無論係經濟、文化等差異，盡量減輕。另外，北京眼中，身份認同仍然存在明顯落差嘅地方，就只剩低疆、藏、台、港。

10，十九大嘅時候，其實都講到明要處理呢四個地方構成嘅國家安全問題。無論邊個做中共總書記，都唔見得呢個國策會有乜嘢分別。畢竟，經歷過上世紀八零年代末、九零年代初嘅衝擊，又見到蘇維埃點樣瓦解淪為第二等力量，以上四個地方，絕對係中共眼中，最嚴重嘅潛在風險。

11，2014 年一次佔中，2019 年一次反送中；從北京嘅角度去睇，會想盡快加速呢個城市嘅「融合」。制度上嘅大手術，都做得七七八八；文化上嘅大手術，亦都進行當中。但經濟上呢？早在曾蔭權年代，十一五香港第一次被規劃，當時已經講大灣區；當時嘅政府好快手整咗幾個基建，其中之一，就係高鐵。

12，微觀咁睇，將香港嘅人口同經濟重中向西北移，漸漸同深圳融合，都唔可以話唔合理。財團其實亦都有部署，例如近年經常有人放風，話不如將個貨櫃碼頭轉來起樓；反正深圳貨櫃碼頭規模更大。最緊要係起樓之後，賣咗，套到現，更實際。

13，十年、廿年之後，香港貨櫃碼頭仲係唔係今日嘅規模呢？我都好懷疑。又好記得，細個嘅時候嘅社會科，會話香港地方細細，但又係世界輕工業嘅重鎮，又有全世界最繁忙嘅貨櫃碼頭，仲有一個全世界第四大嘅金融市場，僅次於紐約、東京、倫敦。當時做香港人，真係有一份自豪。

14，當時嘅情況係，全國十億人，就只有呢一度活門。假如話深圳係經濟特區 1.0 , 香港就係經濟特區嘅元祖。可以話，無錯香港同香港人，受惠於呢個神奇國度嘅封閉；就正如晚清嘅商行商人，香港嘅華人買辦，富可敵國。但唔好忘記，亦都係因為有一國兩制呢度防火牆，牆國內嘅世界可以唔需要改變，可以自己妙想天開，自把自為。

15，珠江口以廣州為中心，過去幾百年都係山高皇帝遠嘅手工業同貿易港。可以話，好似香港，最多都係思想比較開放，多啲新奇有趣嘅事物，未至於會威脅到北京。所以，北京可以容許南方有一個經濟政治文化中心，但從控制嘅角度，必須要直接指揮；目前嘅情況，大致亦如是。

16，從全國宏觀角度，南方深港既係金融科技中心，而長江流域到長三角，又係另一個經濟中心，而北方呢？北京作為首都，其實主要係歷史因素。當年朱元璋稱帝，定都南京。到後來明成祖遷都北京，因為當時嘅國防需要，主要面漠北嘅遊牧民族。

17，珠三角、長三角以外，中共想京津冀區域都有一個咁高咁大嘅經濟中心，都唔難理解。但返去最初嘅問題：究竟用經濟特區嘅方法，可唔可能建立出金融、科技中心？

18，曾幾何時嘅經濟作業，只係做吓生產工業，制度上要配合，例如勞工、廠房等相關嘅法規，亦相對容易局限於一個地方。但科技科研中心，就唔係話「啤」就可以「啤」一個出來。當年香港都搞咗個數碼港；睇返轉頭當年老董無疑睇中個勢，但執行比想像中困難。硬件容乜易起？人才、制度呢啲軟件，先至考功夫。

19，好似過去嘅香港咁，合約仲裁、金融、稅制等，完全設置於防火牆以外，尚且都有多少矛盾。假如將呢整套資本主義嘅相關制度搬入牆內，一係就個所謂金融中心，無法與國際「對接」，一係，就力量大到令牆內出現裂縫。

20，十四五公布後，又聽到唔少人質疑，中國係唔係擺脫唔到 middle income trap 。簡單講，當一個地方只有經濟發展但無制度改革；其實最終都只係出賣勞動力同資源，一定會遇到增長嘅局限。換句話說，當呢個神奇國度幾十年來都係用同一套思維；以為有硬件，就可以用自己嘅方法，去操作機器，事倍功半已經還得神落喇。