2021.09.28 (Patreon)

01，大摩前經濟師，當年幫特區政府做「經濟機遇委員會」嘅 Stephen Roach 近來都幾勤力寫文，話北京嘅 redistribution + re-regulation 令佢感到憂心；好似 Roach 呢啲曾經都見識過吓 1970、1980 年代嘅人，自然會對曾幾何時嘅改革開放念念不忘。佢認為習近平其實係將當年鄧小平所做嘅事，逐一否定。佢認為，共同富裕以及無定向風式嘅規管，北京好可能計算錯誤。

Connecting the Dots in China | Stephen Roach | Project Syndicate 

02，神奇國度成日自稱係法治之區，究竟又係乜嘢一回事呢？WSJ 報道，大陸以中國速度立法，嚴止任何人於任何地方控告大陸公司侵犯知識產權，違者就會被中國政府罰款。問你怕未？

03，唔好忘記，中美矛盾，核心之一就係大陸企業侵犯其他國家企業知識產權。可能有人會話：「知識產權之嘛，你哋用咗，你又唔會少忽肉嘅，做乜咁孤寒喎？」事實上，好似華為，一路 free ride 人哋嘅科研成果，一句唔該都無，就話自主研發，仲要做爛市，你話呢啲係乜嘢世界公民嘅質素？就係咁，一個國家長期處理道德低地，結果就日日同自己講：「誰大誰惡誰正確。」久而久之，舉國上下都係咁嘅倫理邏輯，神奇國度嘅價值觀，亦同普世文明越行越遠。

China Wields New Legal Weapon to Fight Claims of Intellectual Property Theft | WSJ 

04，早排見有人話，既然放得孟晚舟，會唔會下一步連 Donald Trump 年代嘅懲罰性關稅都撤銷埋㗎？Washington DC 其實過去一年，不斷提五 Biden 政府，唔好忘記美國企業嘅利益，尤其係以 301 法案去對付神奇國度侵犯知識產權呢件事。科網企業係目前美國投入最多人力物力做 lobbying 嘅行業；所以從種種跡象見到，中美經濟層面嘅矛盾，至少呢個問題暫時仍然會糾纏。

Will Biden also accept Chinese IP theft? | Derek Scissors | AEI Blog 

05，「分散投資」呢個智慧，其實原來都唔係咁歷史悠久；甚至到今時今日，坊間主流思想都仍然係追逐 alpha。追逐 alpha，亦即係我哋平時所講嘅「要跑贏大市」。要跑贏大市，代價就係要承受一定嘅風險。但究竟風險點計算，點預測，其實一啲都唔科學。預期風險大過預期回報吖嘛，我知；但點解有咁大隻蛤乸隨街跳嘅？資訊不對稱？點解人人都唔知嘅嘢，係你先知？

06，我唔係要質疑大家獲得資訊同分析資訊嘅能力，但係每個預測，每次投機，每次認為自己可以跑贏大市嘅時候，都要問吓自己，點解影響自己作出決定嘅資訊，係其他人未必掌握得到；而且當中有幾成真。

07，唔追求跑贏大市，其實要同大市同步，都一樣咁困難。分散風險，理論上最完美係做到自己嘅 portfolio 當中嘅比例，同整個世界嘅資產分佈一樣。甚至可以話，要建立一個咁嘅 portfolio ，仲難過追逐 alpha。所以話，要零風險，一樣係不可能，正是 damned if you do and damned if you don't 。

08，不過 The Economist 呢篇文叫人 portfolio 要有少少 bitcoin ；咁啱神奇國度就話要全禁 cryptocurrency。我嘅睇法係：「禁到，咪禁囉。」牆國裡面，其實真係唔少人炒 crypto 。往後嘅日子，牆國裡面嘅人要用人仔買 crypto ，唔止有溢價，仲有時差。仲唔快啲謝主隆恩？

Why it is wise to add bitcoin to an investment portfolio | Buttonwood | The Economist

09，人會不知不覺間，令自己變成心目中嘅魔鬼；越係厭惡某種人，就越易令自己嘅行為思想變得同呢啲人好相似。尋晚同湛國揚拍擋做彌敦道政交所嘅時候，發現自己好躁底；反省過後發現，應該係睇咗小粉紅同藍朋友嘅言論，條氣唔順。但成件事其實只有我自己躁底，諗落都幾無謂。不過，呢次情緒起伏，又令我諗返起自己曾經寫過嘅一篇文章。

躁動情緒在蔓延 | unsubject 

10，至於呢集彌敦道政交所，睇返原來都講咗成兩粒鐘；貼堂警戒自己，下次唔好咁失禮。

孟晚舟何價 | 彌敦道政交所 

11，最後，今日有個少少嘅反省；究竟點先為之一個真正的 contrarian？純粹睇法同其他人完全唔同，係咪就係 contrarian ？Contrarian 係一種思想上嘅習慣，係刻意去搵一啲自己唔認同嘅人，去認真咁去睇吓從對方嘅觀點，會唔會見到自己忽略嘅盲點。

好多時，人會有意冇意咁，專登搵對方陣營裡面，最思想混亂嘅人，去證明自己更優越。呢個做法，只會令人長期停留低水平，唔會進步。進步，就係不斷挑戰更高層次。

你身邊又有冇邊啲人（或思想），你雖然唔認同，但又覺得好似點都反駁？唔介意嘅話，可唔可以同我分享下 mail@unsubject.me ？

（下回預告：聽日會寫篇詳細少少嘅 #分析中國電荒 ）