【隨筆】《魷魚遊戲》的延伸思考 (Patreon)

01，《魷魚遊戲》大熱，人人都評兩句，我又湊吓熱鬧。

02，呢套戲觸動到我心底一個長期困擾問題：「我哋究竟有冇真正長大過？」嗯，我好主觀咁覺得，《魷魚遊戲》其中一個 subtext，就係呢個問題。

03，唔單止係我自己，我眼中嘅其他人，好多時都見到佢哋幼稚嘅一面。咁講，並非貶義；我只係想話，其實我眼中，每個人都有細個嘅時候。我成日都覺得，其實每個人心底裡，都有無長大過嘅部份，只不過世俗面前，每個人都要有所修飾隱藏。

04，但從呢個角度去了解人性，又會衍生出兩個問題：「究竟人係咪由細細個開始，就已經有人性嘅陰暗面？又或者，成長嘅過程，令人心底裡嘅陰影面積漸漸形成？」《魷魚遊戲》成個故事嘅核心價值，就係呢個問題。

05，另外一個身份危機嘅問題就係：「老，係唔係一個忽然嘅覺悟？人係唔係由一個細路仔嘅心境，忽然間意識到自己時日無多？」意識到「老」，通常都係因為好切身咁樣感受到死亡；就好似劇中嘅 001 阿伯。係，去到最後，就係知道無論係乜嘢遊戲，無論輸贏，唯一嘅現實就係大家都只係曾經參與。

06，當然，有啲人廿歲出頭就認老；通常係女仔，而且係自知有幾分姿色嘅後生女。畢竟，男仔同女仔嘅 formative experience 好唔同；男仔嘅青春期轉變，唔係咁明顯，無咁震撼。亦係呢個原因，好多原始社會，都有成人禮，rite of passage ，透過人為嘅經歷，畀年青嘅男仔知道自己唔再係細路。

07，至於女仔，其實青春期嘅時候，一定會知道自己身心嘅轉變，亦更早意識到自己嘅存在裡面，孕育更多嘅生命。所以，從前人均壽命無今日咁長嘅社會，更容易出現母系社會；當你班男仔都仲係好勇鬥狠去到邊玩邊搵食打野豬，女仔已經諗點樣確保自己下一代嘅溫飽。

08，因為呢個「男仔比較貪玩」嘅普遍現象，所以《魷魚遊戲》人物設定，男角都係平凡得有啲平庸嘅人，反而女角就要好刻意咁去描寫。大膽講句，呢套戲就算無晒啲女角，其實都絕對無違和感。當然，作為一套商業嘅創作，如果一個女角都無，就無乜可觀性。事實上，幾個女角亦因此爆紅。

09，《魷魚遊戲》有啲人見到嘅係社會嘅唔公平，有錢有權有勢嘅人，當其他人係畜生一樣嘅存在；第一集男一去賭馬輸咗老母嘅錢；到後來佢作為參賽者，幕後玩家就係賭佢哋邊個會贏，呢個 allegory 都非常之咁明顯。但令我更印象深刻嘅一句說話係：「好窮同好有錢嘅人，有一個共通點，就係生活都係無義意嘅。」

10，有一派學說認為，人嘅價值觀，大多數都係建立於 7 至 21 歲嘅 formative years，而成長之後人嘅價值觀大致定格；我哋可能對個別事件嘅睇法，會隨著自己嘅處境而有新嘅領悟，但底層去判斷是非黑白對錯嘅基本價值同信念，就好穩定，唔係咁易變。

11，我哋嘅 formative years 究竟係點樣渡過？返學？睇電視？讀書寫字，當然重要，但唔係學習嘅全部。遊戲競技，從來都係好重要 formative experience ；成長嘅時候玩乜嘢遊戲，點樣玩，同乜嘢人玩，都會潛移默化咁影響到我哋嘅社會觀念。

12，好似我呢班成長於 1980 年代，算係比較早接觸到電子遊戲嘅，想像中嘅世界好易有「現實 vs 虛擬」嘅二元對立。對 baby boomers 嘅一代，呢種 conception 可能唔係咁 intuitive ，但對我哋來講，就好似理所當然。當人人都講 metaverse 嘅時候，其實只係反映目前嘅社會，終於由成長於電玩世界嘅一代人去話事。

13，呢代人，可能從來都無完全長大過；雖然都已經成四十幾歲人，個腦成日諗玩玩玩玩玩。曾經讀過一本書 From Men to Boys ，就係話 adulthood 嘅消失，因為我哋仰望嘅 role model 唔同咗，價值觀亦都唔同咗。

14，究竟下一代嘅人，玩啲乜嘢遊戲長大？佢哋嘅 formative experience ，又會點樣影響未來嘅意識形態？又或者，去到佢哋嘅一代，終於唔再有長大呢回事？ 每個男仔都會係 Peter Pan？

15，每代人都會覺得自己處身於兩套價值體系；一隻腳踏在過去，另一隻腳伸向未來。舊社會嘅價值對我講，成長，就係明白到自己生命，對前人，對未來，都有各種嘅責任。

16，唔好誤會，我並唔係抱怨。好記得曾經讀過另一本書 All Joy And No Fun ，講帶大細路嘅各種壓力，各種瑣碎事，其實係為人父母嘅存在感，幾十年後睇返，所有回憶，都係苦盡甘來。

17，不過，生兒育女，已經唔再係人生嘅必然階段；可見將來，家庭嘅觀念將會再進一步改變，女性嘅社會地位，亦會同目前有好大分別，社會大眾對照顧其他人嘅責任，亦將會有唔一樣嘅 conception。凡此種種，都將會影響到社會經濟結構同政治。不過，下一代人嘅事，最終都應該留返畀佢哋自己去決定。

18，睇《魷魚遊戲》嘅時候，我有好多次都曾經懷疑過，作者有冇暗示 001 可能係 456 嘅老竇。 無論如何，唔好忘記，未來嘅人，佢哋長大嘅呢段日子，所玩嘅遊戲，所經歷嘅事情，多少都係由我哋所主宰。