香港如何走上奴役之路 (Patreon)

01，今日林鄭月娥發表佢呢屆任期最後一份施政報告。好多朋友都話：「挑，都無任何期望喇，關我乜嘢事？我做乜要關心？」明白嘅。不過，我仍然想同各位講兩件事：一，施政報告前就一定有好多 spin，目的係想大家相信，政府做緊嘢去處理香港嘅問題。二，每個政策，但凡涉及利益嘅再分配，不論原意，結果多數係利益越來越集中；少數人搾取多數人嘅利益，往往係易過多數人從少數人身上得到好處。

02，呢份施政報告，本來我都諗，會唔會有可能睇到啲蜘絲螞跡，去推測林鄭嘅去留。但諗深一層，我認為正路嘅推測係，香港根本無人知下一屆會邊個做行政長官，甚至去到明年第一季，都未必有明確嘅答案。所有局中人，其實都只有盡量爭取對自己最有利嘅條件，同時對北京來講，亦唔可以出現「無咗邊個唔得」嘅情況。無錯，每個有可能做行政長官嘅人，每個等上位嘅人，都只有估估下。

03，例如陳茂波，你見佢近來好積極，又話自己成功推兩次消費券，又話會好好發揮一國兩制嘅優勢，幫國家乜乜物物。你話佢係唔係有心要更上層樓？當然唔可以排除後面有人叫佢做好準備，但叫佢嘅人動機係乜，又係唔係有乜嘢保證？見過唐英年同曾俊華嘅經歷，有正常智商嘅人都會明白，所有慫恿他人角逐行政長官嘅力量，都唔係出於無原無故嘅愛。

04，我亦都聽聞，林鄭有意推許正宇做財政司司長，而許正宇亦據聞熱身當中。有一個可能就係下一屆政府，直頭飛起陳茂波；但呢個部署都要出師有名。假如陳茂波辭職參選，咁就順理成章由許正宇上，係唔係？所以呢個將會係一場搏弈；對陳茂波來講，做到財政司司長，本來就已經賺咗。

05，又有冇可能完全唔需要角逐，林鄭自動連任呢？機會就一定有，但呢個局面又意味啲乜呢？全面統治權？兩睇喇。林鄭自動連任，就好似老董第一次「冧庄」，結果亦同時係西環急速擴嘅原點。以上嘅沙盤推演，無非都係想從已知嘅資訊，去搵出幾個最可能發生嘅結果。但始終都唔可以排除有更多更冷門嘅可能性。

06，更重要係從呢啲大家都見到嘅事，可唔可以推理到北京對香港嘅態度同策略。從前，我哋有太多天真嘅幻想，以為一國兩制係為安香港人嘅心，高度自治就真係除咗國防外交其他事香港人話事。全面管治權都話咗大家知，香港只係為中央執行政治，事無大小，全部北京直送。

07，另外，坊間呢期都好多鬥地主嘅論述；熟悉政府「預期管理」就明白，呢啲帶風向嘅操作，無非都係想有更多人相信「政府做緊嘢」。做唔做到，並非重點，重點係政府「有決心」。每次聽到「有決心」呢三個字，幾乎可以肯定，當事人一係就唔知問題核心係乜，又或者唔願意去面對真正嘅死結。

08，無論係香港，抑或大陸嘅各地方政府，地產經濟都係最重要嘅公共收入來源。另外，其實自從各國央行競逐式咁擴大資產負債表，即係放寬信貸增加貨幣供應，房產呢類非貨幣資產嘅價格就失控。最簡單嘅講法就係：「你認為央行印銀紙快啲，定係以中國速度去填海造地起樓快啲？」

09，所以無論物理上抑或制度上，都睇唔到點樣可以有一個快速無痛嘅方法，去處理資產價格不斷上升嘅問題。曾幾何時，大陸都曾經有試過以增加股票供應去吸納呢啲資金，同時借資本市場去提升生產力。奈何你見到過去幾年，呢個資本市場嘅遊戲，最終都係會益咗外國嘅投機者。由今年起打壓新上市嘅創科企業都好明顯反映，北京都積極將自己嘅系統同外面嘅世界 decouple ；何解？

10，我嘅假想係：「北京唔想見到有資本家借國際資本市場，為自己建立不可替代嘅地位。」嚴格來講，呢個方針由十九大已經醞釀；乜嘢共同富裕，資訊安全，亦只係表面堂而皇之嘅包裝。

11，香港本來嘅功能，就係一國兩制之下，容許中共繼續圍牆裡面閉門一家親，同時可以得到國際資本市場嘅好處。廿一世紀，中共唔再想出口商品同貨物，而係要無本生利咁輸出各種金融產品。「香港有冇條件？」更核心嘅問題係，中共有冇呢個能力？

12，正路推測，施政報告應該都會見到以上相關嘅論述。通常施政報告後嘅一段日子，呢啲都會成為新聞嘅焦點；但好可惜以今時今日香港嘅狀態，主流媒體恐怕都唔係好識得點樣去處理呢類嘅宏觀經濟討論。甚至乎以前其實好多時呢類題目，都係人云亦云，得過且過咁糊混收場。上面話要講大灣區金融，要講前海，要講科技，香港嘅媒體就會好聽話咁，跟主旋律和唱。

13，事先張揚嘅另一件事，就係政策局嘅重新規劃。已知好大可能發生嘅係會開一個文體藝嘅局；從前呢類事宣，都係由民政負責埋。康樂文娛，係大眾參與嘅消閒活動，中共眼中嘅文體藝，係要型造可以令群眾去追隨嘅國家自豪感。我嘅講法係，最高目標要令群眾國家係值得去 die for，再唔係都係值得 fight for，最低層次係 pay for 。

14，但觀乎過去七十二年，除咗體育，中國大陸嘅文藝，真係行唔出去國際舞台。本來香港嘅流行文化，都曾經係亞洲首屈一指，四大天王紅到去印度。當然，仲講四大天王太陳舊；係囉，愛奇藝可唔可能打低 Netflix 呢？原因，大家心照。

15，我都可以幾肯定咁講，施政報告一定會話：「我已經預留X百億發展香港嘅文藝產業。」各位同學，每次開一個新嘅 establishment ，其實就係派錢嘅時候。正如一開始所講，每次有利益分配嘅時候，都係少數人得到多數利益，呢個幾乎係社會規律嘅第一條。

16，至於體育，香港會主辦下一屆全運會嘛，一定又會借機去話政府會增加對精英運動員嘅培訓支援。不過，好可惜嘅係，雖然出戰嘅運動員會得到一啲回報，但我都好肯定中間落格嘅人更多。其實香港嘅體育界，從來都係由一班四肢不勤九唔搭八嘅親建制權貴圍威喂。所以，成件事又係「做咗當得咗」。

17，另一個事先張揚嘅改變，就係運輸同房屋會分家。香港嘅房屋政策，一直以來都只係講公營房屋，至於運輸，亦好大程度上係公共運輸。本來運房集一局，唔可以話無佢嘅邏輯，尤其係如果認真檢討上世紀屯門、天水圍、東涌等新市鎮嘅初期，都見到有大量公屋嘅偏遠地區，往往都係社會問題嘅溫床，運輸發展的確係城市發展嘅一個好重要元素。不過，將規劃地政運輸集合發展局，亦未嘗不可。

18，單獨存在嘅公營房屋政策，結果就會要同其他政策範疇去爭取土地資源。另外，公營房屋政策另一個好多人忽略嘅重點，就係長遠啲資金需要。其實早在上世紀七十年代，殖民地政府推出居屋，一來係要騰空公屋單位，但另一方面都係要為房委會提供資金。

19，林鄭會唔會提出有更多唔同形式嘅公營房屋，甚至乎非常接近私人市場水平嘅供應？好似董建華年代嘅夾屋，當時正值經濟低迷嘅日子，就當然係失時機。但如果今日特區政府推出類似嘅政策，即係連私人發展商嘅功能都做埋，我絕對唔會覺得出奇。

20，另一個坊間有傳嘅政策局轉變，就係將商務經濟發展同創科重新洗牌。我覺得都唔係無可能，反正都係派錢嘅名目。香港已經確立咗「創科綜援」，都唔爭在將呢類計劃擴展到更多行業，美其名產業升級，但實際就係製造更多嘅尋租者。

21，最後，其實自從梁振英做行政長官，就經常出現施政報告時講埋政府將會有幾多幾多錢，做乜乜物物。呢個逆轉編制預算案嘅做法，其實埋下今時今日香港結構赤字嘅伏線。

22，曾幾何時，每年每個政策局都要同財政司司長攞預算；財政司就以量入為出原則，同各政策局討價還價。但係當個個都話行政長官已經預留幾多錢，唔該放水，財政司就唯有從唔同嘅豬仔錢罌去搵方法找數。當然，有一段好長時間，香港嘅錢係好似點都駛唔晒，錢可以解決嘅問題，就唔係問題；但俱往矣。

23，聯繫匯率之下，香港政府係唔會有貨幣政策，唔可以量化寬鬆。政府發港元債，亦唔可以透過公開市場運作吸納。最終一係就焗市民買，乜嘢強迫金，年金，都賣少少。

24，一係就國家隊出手，反正人民幣都係印出來，仲可以話乜嘢促進南向通。係，一帶一路都係咁之嘛，中國大陸出鋼筋水泥工人，當地政府就長命債長命還。

25，當香港政府嘅債，最大買家係北京以及大陸各級政府，國家機構，甚至去到一個地步，還息都要靠發新債嘅時候，香港就唔再有高度自治嘅公共財政，呢個先係真正嘅全面管治權。

26，敗到呢一點，要幾長時間？「比想像中要來得快。」一場金融危機，甚至只係一場瘟疫，都足以消耗多年來積落嘅儲備。當社會越來越多尋租者，對公共資源嘅苛索越來越肆無忌憚，風氣嘅轉變，帶香港行上呢條「奴役之路」。