課本無教嘅雙十由來 (Patreon)

01，1911 年 10 月 10 日，武昌起義，後世亦多以呢日作為辛亥革命嘅頭炮。

02，但嚴格來講，中華民國宣告成立，係 1912 年嘅 1 月 1 日；宣統遜位就係 1912 年 2 月 12 日。 後世點解會揀雙十呢個日子去做分界線呢？唔通真係求其搵日？

03，自 1900 年庚子義和團之亂，各地武裝力量即時同北京割蓆（史稱「東南互保條約」），大清版圖上就不斷出現民變、兵變。尤其 1905 年日俄戰爭後，令到大清見到君主立憲嘅小日本，竟然可以打低銳意改革發展嘅沙俄，而且俄國當時都爆發過血腥星期日（第一次俄國革命），以及成立 Duma 同選舉。所以 1906 年大清亦見到勢色唔對，立場軟化。

04，1908 年慈禧宣布會用十年時間進行君主立憲，以保「萬世一系」。若果身處當時嘅時空，見到光緒、慈禧都去同努兒哈赤團聚，你應該會相信，大清將會好似當時其他嘅封建帝國一樣，以君主立憲嘅方式繼續。

05，1909年，宣統元年，各地總督、巡撫同地方鄉紳（即係主要嘅地主）召開諮議局，結論一年內成立各省嘅資政院。非常順利咁，1910 年內就成立資政院，各地向北京講，如果唔召開國會，就唔會將稅款上繳中央。其實，去到呢一刻，正路嘅推斷都會覺得，下一步，會出現和平嘅權力交接。

06，同一個時空，其實各地嘅民變兵變仍然無停過；甚至應該話，係越來越失控。

07，當時其實係有兩派力量。一邊，代表漢人嘅地方武裝部隊，呢班人亦於庚子義和團之亂嘅時候選擇中立；要追溯上去，佢哋其實當年為處理太平天國而成立嘅漢人軍隊，演變成後來嘅北洋軍閥同新軍。同呢班軍閥亦借助地方鄉紳、知識份子等，去發展建立自己嘅勢力範圍。北京對地方失控，釀成以上所提及到嘅政治開放改革。

08，但另一邊嘅意識形態，係更加進步主義，要完全推翻帝制，建立共和政體；呢班就係當時「國際線」嘅「手足」，乜乜會，物物會等。

09，武昌起義之前幾個月，其實剛剛經歷黃花崗起義，由地方控制嘅武裝部隊，當時仍然會出軍鎮壓。革命黨同正規軍，火力上始終有一定嘅差距。所以，當時其實雙方都無想像過，局勢嘅發展會變化得咁快。

10， 假如要數 1911 年發生嘅連串事件，武昌起義雖然有佢嘅符號意義，但真正令到各地方力量倒戈相向嘅觸發點，係四川保路運動。

11，剛才講到 1910 年各地成立資政院，各北京施壓要召開國會；北京嘅回應係：「畀啲時間準備。」同時，北京宣佈廢除軍機處等舊有嘅機制，改以內閣去執行集體領導制。問題係，呢個內閣，又係同一班滿族皇室成員；而且內閣嘅第一個公布嘅政策，就係宣佈將各地陷入財困嘅鐵路發展工程「共同富裕」，成為國有資產。各地投資咗呢啲鐵路工程嘅小資產階級（亦即係剛才所講嘅地方鄉紳、知識份子），都走去示威，甚至有啲被鎮壓。亦係呢個大前提之下，革命黨，地方力量終於搵到共同嘅利益以及目標。

12，點解係武昌起義？當時兩條鐵路，一條係川漢鐵路，一條係粵漢鐵路。今日嘅武漢，其實就係由武昌、漢陽、漢口等組成嘅都會，而以上講嘅兩條鐵路，正係交匯於此。其實古代都有講得荊州得天下，所以呢個地方如果有乜政局不穩，好多時都意味出現南北嘅矛盾。

13，從再宏觀廣義嘅角度去睇，由太平天國、東南互保到武昌起義，都反映北方嘅中央政府對南方失去控制。事實上，大清覆亡之後，呢種南北對峙嘅局面一直繼續，甚至國共之爭，都係自古以來呢片土地上權力分立嘅局面嘅變奏。

14，但返去武昌起義呢一幕，清皇室當時仍然未認輸，仲派當時已經被解除一切職務嘅袁世凱，出任湖廣總督兼欽差大臣，統領大軍平亂。

15，由 1911 年 10 月到年底，袁世凱雖然係湖廣總督，但軍事上佢主要平定華中華北一帶嘅革命黨；南北對峙嘅局面就更加明確。

16，1911 年 12 月嘅時空，其實可能會出現南北對峙，亦可能由北方軍事力量，再次征服南方剛宣佈獨立嘅各省。不過，其實當時北方嘅軍隊，亦都係缺乏資源。所以，以孫中山為首嘅南方黨命省份，好快用袁世凱所領導嘅北方力量達成協議；由袁世凱出任臨時大總統，

17，如果從以上嘅歷史去睇返，就會明白點解當時唔用 1 月 1 日宣佈成立中華民國做國慶，又會唔用袁世凱成功令宣統遜位嘅一日做國慶；因為揀其中一日，都意味承認南方又或者北方先係新中國嘅正統。

18，1912 年 9 月 28 日北京臨時政府通過決議，將武昌起義定為「國慶日」；點解？

19，其實呢個決議之前一個月左右，袁世凱嘅政治盟友黎元洪，以圖謀不軌為由，將發起武昌起義嘅兩個重要人物，張振武、方維處決。

20，話說張振武、方維同黎元洪有一排牙齒印；武昌起義之後，張、方呢兩個新軍將領，想擁立黎元洪做湖北都督；但黎當時仍然想「睇定啲」，曾經一度推辭。期間張、方二人威脅要處死黎，如是者張、方嘅死，當時被普遍認為係黎元洪公報私仇。

21，大概同時，南方革命黨人於北京成立「國民黨」；用當時嘅角度去睇，揀武昌起義做國慶，背後其實包含好大嘅訊息量，並非後世所簡化嘅版本咁講，係為咗紀念一個偉大嘅歷史性時刻。

22，假如歷史畀到我哋任何教訓，我會話令政權崩潰嘅真正原因，係利益分配出現傾斜，但又無一個理性而有效嘅方法去疏導，最終貴族嘅壟斷，變成由另一群人去競逐，然後再瓜分。如是者，過程不斷重複，但又見唔到有乜嘢根本嘅改變。如是者，又蹉跎百幾年光陰到現在。