哥倫布的風水地 (Patreon)

01，「1492 年 10 月 12 日，哥倫布發現新大陸⋯⋯」今時今日美國長大嘅小朋友，聽到呢句說話，一定會糾正：「哥倫布之前，其實歐洲一早有人橫越過大西洋；正確啲咁講，哥倫布係第一個代表歐洲皇室來到美洲嘅人；仲有呀，美洲一直都有人住，係畀歐洲人散播嘅病毒整死晒之嘛。」如是者，Columbus Day （十月第二個星期一）漸漸被 cancelled，並且改名成 Indigenous People’s Day。

02，Columbus Day 成為美國十大法定假日之一，其實都係多得 Franklin D Roosevelt 嘅 New Deal 一部分。扣除星期日，一年其實得三百幾個工作日；星期六休半日，又減多廿幾個工作日。再加十個法定假期，假設工作量不變，其實就係將 5% 左右嘅工作分攤，當時嘅如意算盤係 job sharing 或者多少都可以幫到其他失業人士。結果？當然唔係咁明顯。但久而久之，有工返嘅就將法定假期視為福利，冇工返嘅，都可以陪下有工返嘅屋企人囉。

03，話說回來，其實早在 1792 年，就已經有慶祝 10 月 12 日嘅習俗；當時美國剛剛宣布獨立，連憲法都係只係通過咗三年，聯邦亦只有十五個州，慶祝 Columbus Day 三百年，就同中共慶祝一百年一樣，有一定嘅政治目的。

04，之後嘅日子，自意大利嘅新移民都繼續借 Columbus Day ，去為自己嘅族群尋求身份。畢竟，響呢個以新教徒為主嘅新大陸，以羅馬天主教為主嘅意大利人，屬少數族裔，而且往往被視為落後以及腐敗嘅一群。佢哋為咗證明自己都係新大陸嘅一員，就好聰明咁搵 Columbus 呢個意大利人代表自己。畢竟十五世紀嘅歐洲，知識嘅中心仍然係意大利嘅城邦，就算 America 呢個字，亦都係出自意大利人 Amerigo Vespucci 嘅手筆。從此又學多一樣課本好少講到嘅歷史：美國其實一直都有種族矛盾，只不過唔單係黑人對白人。

05，由獨立到十九世紀統一戰爭後（亦有人叫做南北內戰），美國民族主義亦越來越澎湃；雖然後世嘅教科書，一廂情願美化咗呢場統一戰爭，但結果係美國嘅總統當中，除咗華盛頓嘅國父地位神聖不可侵犯，林肯就係國父 2.0 ；更重要係佢死得轟烈，令到整個神話亦更完美。

06，假如話華盛頓嘅傳奇係帶領新世界嘅人，脫離舊世界嘅欺壓；「讓美國人站起來」。林肯嘅歷史意義就係：「捍衛國土完整」。嗯，咁樣去描繪呢兩個人物，又會唔會令大家聯想到神奇國度嘅政治人物呢？之前寫過篇好簡短（一萬字唔到）嘅美國簡史，請恕我唔重複自己，延伸閱讀大家有時間慢慢消化：

【延伸閱讀】美國與強國 

07，早兩個星期，有朋友同我講：「見你成日話神奇國度嘅諸多不是；既然你自稱為一個 contrarian，不如試從 contrarianism 嘅角度，去比較中美呢兩個國家。」（大概意思）

恭敬不如從命，希望以下嘅答案，會係大家意料之外，但又係情理之內⋯⋯

08，今年初，美國都發生 Donald Trump 支持者衝擊國會案；美國有學者話：「嘩，Trump 學老毛搞文革，炮打司令部喎！」另一邊廂，社會棟樑要將黑歷史從集體記憶消除，又成日話呢樣個樣各樣事情傷害佢哋嘅感情（hurt their feeling），令人反問：「美國呢啲 snow flakes 同神奇國度嘅玻璃心，究竟有乜分別？」

09，「嘻，世界各國嘅文化，都有好同唔好嘅地方；最緊要係有好嘅制度。有好嘅制度，就可以包容唔同嘅人，就算偶爾出現光怪陸離嘅事，最終都可以撥亂反正⋯⋯」以上嘅講法，似曾相識呀；就算我冇 verbatim 咁講過，可以想像以上呢段獨白由我去講出口。上個月分享過 Niall Ferguson 嘅 The Great Degeneration ，講嘅係制度同文化，又貼返畀大家重溫。

10，但既然話今日要連我去連自己都 contrarian ；咁我又試下從完全相反嘅立論開始：「假設，制度完全不重要。」「假設制度完全不重要？可以咩？」可以，點解唔可以？制度，其實係乜？既然無形無體，話根本上唔存制度呢一回事，都仲可以。

11，「如果唔係制度，係乜嘢構成國與國、文化與文化之間嘅差別？」各位，請你哋打開手機 Google Map，一直 zoom out ，見唔見到呢個藍色行星，有山有川有河有海有沙漠有草原；但國界，其實只不過係人為加上去。所謂文明、文化、國境，都如夢幻泡影；再燦爛輝煌嘅歷史，亦只不過係吉光片羽。

12，曾經有朋友問我：「點樣讀世界歷史？」我都係叫佢：「首先，熟讀世界地圖。」十九世紀之前，未有 Political Science，所有國師軍師，必修兩科，一曰歷史，二曰地理。自從交通工具嘅突飛猛進，尤其係航空業嘅出現，令人與人、國與國嘅距離收窄。Internet 普及之後，digital natives 嘅一代，更加係存在於兩個平行維度，地理，就顯得更加無關痛癢。

13，雖然一直以來大學都有地理系，但廿世紀有一段日子，學術小圈子傾向將識知包裝成科學，地理亦好狹義針對 physical geography，講吓岩石地貌氣候之類； 苟延殘喘嘅 human geography 就講下 land Use 、 urbanization 等，再唔係就 GIS 嘅實際應用；實用囉。但過去十幾年，當好多人重新解讀歷史嘅同時，political geography 亦重新多咗人關注嘅學科。 2012 年有本書叫 The Revenge of Geography ，就係以「地理即國際關係」做主軸，去講國與國嘅關係與角力。

14，呢本書有三部分，第一部份係講過去百幾年來對 political geography 影響最顯著嘅幾個代表人物，以及佢哋所提出嘅觀點。第二部份係延伸以上嘅幾套觀點，去講解作者對目對歐洲、俄羅斯、中國、印度、伊朗以及土耳其（Asia Minor）嘅格局。至於最後第三部份，其實得一章，講美國。

15，The Revenge of Geography 介紹嘅主要人物，有 Hans J Morgenthau 、William McNeill 、Marshall Hodgson 、Hanford Mackinder 、Karl Haushofer 、 Nicholas Spykman 、Alfred Thayer Mahan 以及 Paul Braken ；從經濟效益嘅角度，睇一本書就可以涉獵到咁多人嘅觀點，從成本效益角度，好抵。

16，第二章 The Revenge of Geography 係全本書嘅總結，亦帶出 Realism 呢個概念；而呢一章嘅主角，係近代 Realism 嘅倡導者 Hans J Morgenthau 。但究竟何謂 Realism？好簡單咁講，Realism 假設國與國之間，只有純粹力量嘅競爭，其他咩意識形態嘅旗幟，只不過係擺出來，自欺，欺人。亦由於國與國之間，經常互相錯判其他國家嘅動機以及能力，所以存活最簡單嘅法則，就係要絕對嘅控制；有時甚至係不計成本代價，都要以控制為首要目標。故此，對 Realist ，秩序比自由重要，安全先於繁榮。

17，當人嘅行為動機簡化成 Realist 嘅版本，地理上嘅關係，就成為國際關係當中，最主要嘅變數。呢個邏輯，簡潔到近乎數學嘅水平。The Revenge of Geography 嘅作者 Robert Kaplan 引用 George West 嘅名句： Nature imposes; man disposes 去解釋以上嘅關係；不過，Kaplan 亦都提醒讀者，呢種睇法唔等於認為世事都由物理條件所決定。佢唔相信歷史有既定嘅劇本，未來唔會完全重複過去；換句話說，認為自然客觀條件，唔代表係 determinist 。一來，世事總有或然概率；二來，Realism 嘅核心，始終係人與人，人與自然嘅複雜互動。

18，第三章 Herodotus and His Successors ，主要介紹嘅人物係 William McNeill 同 Marshall Hodgson；兩位都係芝加哥大學嘅歷史系教授。問題係，天下間咁多歷史學家，McNeill 同 Hodgson 有乜獨特嘅見解呢？

19，McNeill 寫嘅 The Rise of the West，認為世界各地嘅文明，其實不斷互動，但去到不同嘅環境同條件之下，又孕育出獨特嘅風俗文化。另一邊廂，相對於 McNeill 嘅一派，代表人物有 Arnold Toynbee 、Osward Spengler 、甚至後來憑 The Clash of Civilization 聲名大噪嘅 Samuel Huntington ；呢一派就將唔同嘅文明，視為獨立自有嘅因素，唔同嘅文明之間嘅衝突，就係歷史。

20，從 McNeill 嘅方法去睇，文明源於米索不達美亞，然後周邊亦出現埃及、希臘、印度、中國等文明；到十六世紀，各文明開始擴散融合，到十八世紀後漸漸形成今日我哋所認識嘅現代社會。不同文明嘅融匯過程，包括人口遷移、貿易，雖然時有糾紛，但基本上無所謂嘅「文明衝突」。此外，McNeill 呢本書嘅連貫，填補主流歷史慣常以一時一地片段式嘅論述。用 McNeill 嘅講法： History is a study in fluidity, in which things only seems secure and neatly geographically ordered.

21，至於 Marshall Hodgson 所專注嘅，係伊斯蘭文化。上世紀五零年代，學術界主流都係關心歐洲與蘇聯嘅矛盾，好少人好似 Hodgson 咁睇到中亞、中東一帶，先至係國際關係嘅死結。Oikoumene 係一個古希臘字，意思指「有人居住嘅地方」；而 Hodgson 嘅 The Venture of Islam ，提出由尼羅河到媯水，Nile-to-Oxus，即係由埃及到今日土庫曼之間嘅一片亞非大陸，由於缺乏水源，所以亦係人類文明最早依賴貿易，以城市聚居，嘅地方。伊斯蘭文明，最初亦係貿易同城市人嘅文明。到後來呢套文明嘅擴散，以及遇上蒙古征服者嘅融合，雖然地理因素不足以解釋一切，但當中扮演非常重要嘅功能。

22，呢一章借 Herodotus 嘅 Histories 作結 。Custom is king of all；Kaplan 再次強調，從地理嘅角度，雖然一切都好似由客觀條件所主導，但唔好忘記 Herodotus 呢個歷史之父最希望帶出嘅訊息係，人類面對複雜嘅命運，moira ，仍然會爭扎求存，而呢個過程，就係歷史同人文。

23，第四章 The Eurasian Map ，主題係 Geopolitics ，而呢一章嘅主角 Hanford Mackinder ，更加可以話係現代地緣政治觀念嘅元祖。

24，Mackinder 成名之作，並非一本書，而係一篇 1904 年發表嘅論文 The Geographical Pivot of History ；當中主要嘅論點係 “who rules East Europe commands the Heartland; Who rules the Heartland commands the World-Island; Who rules the World-Island commands the World.

25，Heartland 所指，其實蘇聯以及中亞一帶；World-Island 就係歐亞非大陸。其實歐洲同亞洲嘅界線，並唔係咁清晰，將 Eurasia 視作一整片大陸，亦無不可，甚至連非洲都加埋入去，仍然講得通。而且正如 McNeill 等所提出，其實不同文明體系，一直都有互動溝，所以歐亞非大陸出現一個近乎同質嘅體系，a closed system，亦唔係無可能。

26，Mackinder 寫呢篇文嘅時候，雖然鄂圖曼帝國已經係歐洲病夫，亦都走到最終一章，但相信當時無人會預見得到，地球將會爆發兩次真正嘅世界大戰，以及之後嘅全球化。甚至到今時今日，Mackinder 所提出嘅觀點，仍然係非常值得去爭議辯論；尤其係佢認為，所歐洲歷史，亦只不過係一次又一次抵禦來自亞洲唔同入侵嘅經歷。

27，與此同時，Mackinder 又提出，中國有條件成為呢個 World-Island 上面嘅其中一個霸主。你無聽錯；1904 年，晚清剛剛先經歷過義和拳之亂，純粹從地理角度分析，甚至唔理文化、不問制度，預言神奇國度最終嘅堀起。但同時之間亦可以掉轉咁講：「如果唔係文化制度，一早就統治宇宙喇。」

The Geographical Pivot of History 

28，Mackinder 某程度上預言咗兩次世界大戰，但第五章 The Nazi Distortion 嘅主角 Major General Professor Karl Haushofer 就更加直接咁影響咗希特拉以及納粹德國 。Haushofer 不但受到 Mackinder 嘅影響，佢更進一步將 Heartland 嘅論述講到係「偉大征服者嘅搖籃」，偉大領袖聽到又點會唔心動？ Haushofer 嘅「三分天下計」，就係德國統治歐洲以及中亞，意大利就由地中海到北非，遠東歸日本管，最後就係被大西洋、太平洋隔開嘅美國，統治南北美洲。

29，你話 Haushofer 嘅 Geopolitik 癡人說夢？其實又有人話歷史係勝者為王，如果唔係希特拉進攻蘇聯嘅時候犯下幾個大錯誤，你又知平行時空之下，Haushofer 唔會被奉為先知？不過，歷史又真係沒有如果；攻打蘇聯失利，Haushofer 失勢，佢同樣係地理學家嘅仔因為行刺希特拉失敗而被處死，Haushofer 亦因為老婆有猶太血統被送去集中營，最終二人雙雙自殺身亡。

30，美洲新大陸，自從十九世紀開始，就有「不干預別國內政」嘅國訓；「吓？乜唔係世界警察咩？阿富汗又點解釋？」其實美國獨立之後，歐洲好快就有法國大革命，無幾耐，拿破崙又復辟。假如你係當年美國各聯邦嘅地主政客，你都會想同歐洲盡量保持距離，免得新大陸走封建制度嘅回頭路，亦因此衍生出 Monroe Doctrine 。到後來，聯邦美國更加醞釀「有美國特色嘅民族主義」，是為 Manifest Destiny。簡而言之，新大陸乃應許之地，只要可以大一統又遠離舊世界嘅是非，將會係眾生之福。就係咁，由十九世紀嘅下半，尤其係統一戰爭後，雖然歐美貿易經濟往來不斷，但政治上係完全隔絕。

31，美國可以話係地球上得天獨厚嘅一片土地，氣候唔太冷，唔太熱，唔太濕，又唔太乾，最重要係 Mississipi 嘅流域覆蓋夠廣，所以真係 from sea-to-shining-sea 都係可耕作嘅土地。Mississipi 嘅出海之處，即係 Louisianna ，當年 Thomas Jefferson 用友情價同法國收購，幾百年後大家都仍然話係史上最化算嘅一宗交易。

32，一直到第一次世界大戰後， Woodrow Wilson 嘗試居中調停世界秩序，但結果未如人意。爆發第二次世界大戰，美國嘅民眾都普遍唔支持介入，直到珍珠港遇襲。歷史往往如此驚人地重複，若非 911 美國亦唔會攻打阿富汗。美國民眾普遍都覺得，除非外星人侵略地球，as per Marvel 故事，否則美國真係唔需要干預太平洋同大西洋對岸嘅事。

33，事實上，就算係兩次大戰期間，美國嘅經濟不但無受到損害，而且繼續增長。但點解由 Woodrow Wilson 之後，美國政府都好似欲罷不能，一次又一次咁泥足深陷？為咗石油？海外市場？雖然好多人都有以上嘅諗法，但今日純粹以 Realist 嘅角度分析，美國嘅地理同政治。

34，The Revenge of Geography 嘅第五章 The Rimland，主角係 Nicholas Spykman ，一個由歐洲移民去美國嘅學者。Spykman 睇法同 Mackinder 相反；佢唔認為 Heartland 係世界局勢嘅關鍵，反而係圍繞 Heartland 嘅西歐、南亞、東亞等 Rimland 各國先至係國際局勢嘅關鍵。Spykman 認為確保連接 Rimland 各國嘅大西洋、印度洋、太平洋以至南極對出嘅海域，先至係兵家必爭之「地」。

35，換句話說，Spykman 構想中嘅國際秩序，就係歐洲亞洲各國同當時蘇聯嘅角力。但掉返轉頭從蘇聯嘅角度去睇，Spykman 就係美國借歐亞各國為 proxy ，阻止 World-Island 嘅霸主問鼎世界盟主嘅寶座。正如一開始講解 Realism 嘅時候所講，國與國之間，那怕係資訊有幾咁透明，只要係從唔同嘅出發點去了解局勢，好易會得出防人之心不可無嘅結論。

36，話說回頭，Spykman 唔希望見到有個統一嘅歐洲，因為歐洲統一，意味會同美國有矛盾，有矛盾，就破壞力量平衡，破壞力量平衡，就會被蘇聯有機可乘。另一邊廂，最初撰寫 The Long Telegram 警告美國要提防蘇聯嘅 George Kennan 就希望團結歐洲力量，先至可以抵禦蘇聯。但無論 Spykman 抑或 Kennan ，其實共識都係可以唔打就唔打，containment 呢個概念，亦係至今主導美國外交國防嘅思維模式。

37，對於亞洲，Spykman 一脈相承 Mackinder 純粹以地理角度分析：

“A modern, vitalists, and militarized China… is going to be a threat not only to Japan, but also to the position of the Western Powers in the Asiatic Mediterranean. China will be a continental power of huge dimensions in control of a large section of the littoral of that middle sea. Her geographic position will be similar to that of the United States in regard to the American Mediterranean. When China becomes strong, her present economic penetration in that region will undoubtedly take on political overtones. It is quite possible to envisage the day when this body of water will be controlled not by British, American, or Japanese sea power but by Chinese Air powers.” Spykman, America’s Strategy in World Politics

38，Spykman 呢本書 1942 年出版，所以寫以上一段說話，可能山本五十六都未襲擊珍珠港，美國亦未介入太平洋戰爭。就正如佢自己響 America’s Strategy in World Politics 開首所講，分析外交最重要係地理，因為地理嘅事實，係最恆久不變。

39，去到第七章，亦係好多軍事迷最感興趣嘅一章，題為 The Allure of Sea Power，主角係十九世紀嘅 Alfred Thayer Mahan。Mahan 不但影響 Spykman ，甚至當時嘅美國總統 William McKinley，一樣受到佢嘅影響，接受咗美國就算唔介入歐洲大陸嘅政治，都必須確保大西洋嘅秩序。

40，事實上，美國最初獨立，有一個可能就係各州各自為政，但最終都係組成聯盟，原因就係要組織海軍。一來係資源問題，二來係維持大海上嘅秩序，對各州都有好處；至少獨立初期來講，各州都有出海嘅需要同條件。

41，Mahan 亦將加勒比海，比喻為美國嘅地中海。地中海對歐洲嘅軍事戰略意義，由古希臘時代就已經開始確立；甚至到近代，仍然都有影響。遠嘅唔講，希臘嘅國債咁高，好多人都話係因為福利太好，但好少人留意，按人均計希臘嘅國防開支係歐洲最高，原因就係要防守愛琴海，而愛琴海接連黑海，黑海就係俄羅斯可以出到海嘅其中一個地方。

42， 1900 年出版嘅 The Problem of Asia，Mahan 斷言俄羅斯由於缺乏海港，所以難以發展貿易；無貿易關係，就亦容易變得侵略；百幾年來，西方社會對俄羅斯嘅觀感，都無乜點變過，又或者「地理因素恆久不變」，國際關係格局亦大同小異嘅另一個例子。

43，至於美國，正如以上所講，加勒比海係必須要控制呢個想法，亦係點解冷戰期間古巴導彈危機，會令美國政府咁感到挫敗。此外，開通巴拿馬運河之後，加勒比海可以通往太平洋，亦令到呢個海灣嘅意義更重要。某程度亦可以解釋，點解南美再亂美國都可以當睇唔到，但中美洲就唔可以畀蘇聯統戰。

44，The Revenge of Geography 去到呢一章，仍然畀人一個好強烈嘅感覺，假如恆久不變嘅地理因素有咁巨大嘅影響力，點解國際政治仍然有咁多變數？第八章 The Crisis Room，主要介紹嘅人物係 Paul Bracken；但佢同以上咁多章嘅主角有一個分別，就係好少人聽過 Bracken，更少人讀過佢嘅著作。

45，Bracken 所講嘅 Crisis ，係當歐美都主張全球化同普世價值嘅時候，歐亞大陸上面就出現各種民族主義；另外 Bracken 提醒，科技除咗係改善群眾生活，創造財富嘅工具，同時亦係戰爭嘅武器。由以色列到北韓，每個國家都擁有核武同導彈技術，與此同時，呢一個地帶亦有極頻繁嘅經濟活動，人口密度亦極高，都市化得非常之急速。再加上媒體嘅普及，可以想像得到，雖然地理上各種因素恆久不變，但人同環境嘅關係，就因為科技而出現重大轉變。

46，民粹主義抬頭，對 World-Island 上面嘅呢連串 Rimland 各國，影響可以有幾大，對國際關係會有點嘅影響？由第九章到十四章，Kaplan 分別由歐洲、俄羅斯、中國、印度到土耳其，逐一分析。

47，中國嘅一章，雖然無仔細咁講一帶一路，但對西進以及南中國海嘅分析，非常之詳盡。至於對台海局勢，有一段講到 RAND 嘅分析，2020 年後假如解放軍武力攻台，美國都無能力去防守。當然，RAND 嘅沙盤推演，亦都唔一定絕對正確，但當中有好多參數都反映一定嘅條件限制。

48，台灣對中共嘅意義，在於如果將南中國海視為「中國的地中海」，咁就明白點解北京咁想要完全嘅控制。最進一步咁比唯，馬六甲海峽，對中國來講，就有如巴拿馬。如果新加坡親美，北京係唔會唔干預。

49，如是者，就係從Realism 嘅觀點去分析國際局勢，其他意識形態吹水嘢，真係沒有誰比誰更高尚。甚至唔睇制度文化，單憑地理關係，都可以剖析得到國與國之間嘅矛盾。同場加映推介 Tim Marshall 寫嘅 Prisoners of Geography ；呢本書以十章去講世界十個地緣政治嘅現象，簡單易明。

50，返到去最初嘅我個位朋友提出嘅問題，唔去比較中美嘅制度優劣，有冇得去比較兩國？有，唔單止係咁，而且可以見到兩國有好多相似之處，亦可以明白到點解兩國有咁大矛盾。再強調一次，從 Realism 嘅角度，唔睇意識形態，兩國都有矛盾，有機會發生衝突。

51，「咁講，咪好 deterministic ，好宿命論囉？」有咩問題？假如話，任何個人，對歷史嘅影響，都係微乎其微，每個人都只係小角飾；那怕華盛頓、林肯、拿破崙、希特拉、毛澤東、習近平等，全部都無出現過於世上，結果都可以由另外一啲人去做佢哋所做嘅事，最終太陽又如常升起。

52，我認，以上咁 Deterministic 嘅觀點，係極端嘅，但我係刻意咁極端；因為只有咁樣，我先至可以順理成章咁帶出一個更深入嘅問題：「假如撇除個人嘅因素，都仍然可以有效咁推測得到文明與文明之間嘅關係，咁制度嘅分別，又會唔會其實無想像中咁大呢？」

53，有啲論說，例如 Why Nations Fail 嘅  Daron Acemoglu 同 James A. Robinson 就認為，同樣嘅文化，同樣嘅地理條件，只要制度有分別，就可以有好大分別。曾幾何時，幾乎所有信奉呢套「制度決定論」嘅人，都會用香港對深圳，南韓對北韓等做例子。

54，討論制度優劣，前提係制度演變，可以由人為所控制，即係話，大家可以透過主觀願望，去選擇任何制度，而且不論地方，不論時代，不論文化，都可以行任何制度。

55，事實又係唔係咁呢？假如歷史有如果，美國會唔會發展成一個奉行共產主義嘅神奇國度？中國、俄羅斯，又點解唔係資本主義搖籃？假如從地理嘅角度去分析，又似乎有啲條件更有利某啲制度嘅出現。換句話說，會唔會真係好 deterministic 咁講，中國雖然版圖大，但資源同人口分配不均，所以更易出現大一統嘅計劃經濟專政統治，不斷以再分配去維持平衡？美國，由於幅員遼闊而且各州都勢均力敵，所以更易孕育出聯邦政府共和代議政制？

56，如果制度嘅出現，好大程度由於客觀自然環境嘅影響，係唔係就唔存在優劣嘅討論？正如唔同嘅生物，只有話唔同嘅環境下，有唔同嘅生存模式同適應能力；正如「八爪魚比鯊魚更優越」呢個命題，其實無可辯之處。

57，要補充嘅係，人除咗理性，亦總有感性嘅存在。主觀嘅喜惡，為人之常情，無話正確與否；我唔鍾意食榴槤，都唔需要有理由。我係唔鍾意中共，亦唔需要問點解。更重要係，唔好因為自己唔鍾意一件事，就走去支持呢件事嘅對立面。唔鍾意中共，唔代表要支持中共嘅對頭人。敵人嘅敵人，唔一定係朋友；朋友嘅朋友，亦可以係陌生人。任何大政府，都一樣係對個人自由嘅威脅，美國如是，中共如是。

58，「咁你又去美國生活？」各位同學，今日寫咗成幾千字，歸納到最後都係希望大家記得兩個字：「地理」

59，又或者改個講法：「風水」自哥倫布以來幾百年，登陸呢個地方嘅人，個個都有自己嘅故事；唔少人當年畀人賣豬仔嘅，又或者係黑奴，受盡各種委屈，但佢哋嘅後人，只要自己肯生性，佢哋美國過嘅生活，好過前人，亦好過留響故鄉嘅親友。呢個，又係唔係「風水好」嘅定義呢？