【傳媒解讀片】如何辨別假資訊 (Patreon)

利世民 ｜ 傳媒解讀片 ｜ 如何辨別假資訊

尋日，葉劉接受 Bloomberg 訪問，講咗句「可以考慮免對大陸到港置業人士徵收雙重印花稅」；訪問出街後，市場爭相報道。之後雖然葉劉同政府都分別澄清，呢個只係新民黨嘅觀點，但傳聞已經令到香港地產股急升 3% 。 今日想借呢個機會，分享一個幾個月前寫落嘅題目：「如何辨別假資訊」。 首先，係定義何謂新聞。 新聞最少有三個條件： 一，事件應該係剛剛發生，大多數人都未知嘅； 二，內容係事實，而唔係觀點； 三，內容之間有關連。 從此引伸，要精心炮製假資訊，亦有三式： 一，舊聞當新聞，old news is so exciting； 二，用事實包裝觀點； 三，將本身無關係嘅事，鋪陳成好似有關係。 以上三式當中，又以第三式最變化多端。 所以，要對抗假新聞，亦有三招基本功： 一，睇吓內容入面有冇任何時間嘅參考點，假如整篇都無提及時間日期，要小心； 二，Fact Check 並唔係去 Google ，而係要到現場，至少有可信嘅在場人士。如果係靜態內容，要見到官方文件，唔可以單憑其他人嘅轉述。 三，分清內容裡面，乜嘢係事實，乜嘢係觀點。 如果大家睇完，三招都仍然嫌係太多，可以只要記得一件事：人最大嘅弱點，就係永遠都只會見到自己想見到嘅事。假資訊嘅目的，就係要人對號入座；你越係有成見，就越易中招。