人權與特權 (Patreon)

假如唔係財政司司長中招，市民都唔會知有個類別叫「康復個案」；原來中招陽性唔緊要，最緊要係 CT 值；CT 值高，唔戴罩同枱食飯吹水唔抹嘴都無事。

人權同特權；分別大家知唔知？

藍朋友、小粉紅會話：「有錢，就有特權；無錢嘅，咪學人講人權囉。」

不如我又畀大家一個簡單嘅定義：「人權，唔係話有你無我。任何一個人嘅人權得到保障，不但唔會另其他人有損失；而且每個人嘅人權得到保障，理論上應該因此得到保障。」

特權，顧名思義，唔會推而廣之；某人可以被評「康復個案」，但係當其他人有同樣情況，又唔可以得到同樣待遇。又或者某位幸與不幸被傳媒訪問到的南非旅客，最終得藍碼加貴賓包廂招呼，卻其他人有同樣遭遇的人，又有沒有同樣的補償？。

好似陳茂波極速康復陽性 ，問題唔單係某人享有特權，更重要係點解社會絕大多數人要接受自由被剝削。

見到七人欖球隊入面，一眾官員、權貴，唔載罩，大杯酒，笑得好開心，我哋要問嘅問題，唔係點解呢班人有特權，而係點解其他香港人要受埋啲不合理嘅規限。

特權嘅定義就係：「每當一個社會泛濫特權，其實亦反映多數人嘅基本人權被普遍地剝削。」

如果同我講，話規限係科學嘅；好吖，咁點解又可以有咁多例外？咁人可以有特權？

認咗佢喇。所謂準則，根本就係政治決定；政治決定背後，就係遠在中南海嘅權力核心，已經要將乜都提升到意識形態水平。

從前嘅香港，雖然一樣有特權，但至唔會將人權當特權。

香港被神奇國度吞噬之後，唔少人權漸漸消失。有啲人，當佢哋得到一啲本來係人人都應該享有嘅，佢哋竟然以為有特權而沾沾自喜。

其實呢班自以為高人一等嘅特權階級，只不過係因為佢哋生活嘅環境，就連呢啲咁卑微嘅願望都好似遙不可及。

有啲終其一生都仍然停留口腔期嘅人，會話溫飽先係基本人權。但如果你相信人活著不只是為了麵包，就知道思想同言論自由，先係最基本嘅自由。

講到呢度，我可以想像啲藍朋友、小粉紅會話：「有自由都要有責任先得㗎。」

當然，唔好話歐美，其實香港老早就有好多公民社會自發嘅慈善，早在十九世紀都已經有；啲人何止對社會有責任感，直頭主動去為社會做事，解決問題。

反觀神奇國度，公民社會被扼殺，一般人可以做嘅就係沉默；唔好多管閒事唔止係生存哲學，甚至會被視為智慧。究竟係因為啲人連自由都無，所以咁不負責任？定係因為啲人不負責任，所以唔配享受自由？

實情係，一班無人權嘅人，不但唔覺得社會上有特權階級有乜問題；佢哋只係希望自己有朝一日都可以成為特權階級嘅一份子；去剝削人，總好過自己被剝削。