【是日隨筆】背後一定有人搞事 (Patreon)

民智未開嘅地方點解特別多陰謀論？

從前嘅人，見到各種天文現象，都講到係上蒼對人類社會嘅回應；各種嘅神話，鬼話，亦都變成統治嘅工具。

「唔係㗎，好邪門㗎。」可能喇。但先此聲明，我唔係無神論者（Atheist）。相反，我係「不可知論者」（Agnostic）；即係我相信，如果真係有造物者，有更高層次嘅存在，亦唔係我哋呢個低層次嘅人，能夠理解、證實。

講返陰謀論。民智未開嘅社會，特別多陰謀論。

陰謀論就係相信：「背後一定有『人』搞緊一啲嘢！」

咩「人」呢？「搞」咩呢？為乜要「搞」咁多嘢呢？

好可惜係，因為大多數人嘅思維意識，就只可以透過呢種「擬人化」（Personification）嘅方法，去理解個世界。

甚至乎，連自然現象，都係有「人」背後操控緊大千世界入面嘅每一件事。 但係當我哋對宇宙嘅認識越來越多，不能解釋嘅事，其實越來越多，但最少我哋唔會再用過去嘅「擬人化」嘅意象，去解釋現象。

例如，Adam Smith 嘅「見不到的手」（Invisible Hands），都只係一個比喻；唔通佢真係相信後面有「無法可修飾的一對手」咩？

當然，以上用引號括住嘅「人」，唔一定係人；更正確啲嘅講法，應該話係「人性」。

記得幾十年前讀一科中國語文及文化，課程設計好強調中西文化差異；每次講到呢一點，幾乎都離唔開：「中國文化重情；山水風月花鳥蟲魚，通通都有人性。」

哦，係咩？不如掉返轉頭去睇，就係中國文化就係去到廿一世紀，都仍然無將現代嘅價值觀內化。

現代嘅其中一個象徵，係科學方法。而科學方法，就係漸漸由呢種「背後一定有『人』搞緊一啲嘢！」，演進到從環境條件限制等客觀因素，去了解事情嘅因由同結果。

科學方法除咗係「信」客觀證據，另一個重點就係假設任何理論都有可能被推翻。理論被推翻，唔代表個理論一定完全廢晒武功；相反，新嘅理論好多時都係建立在前人嘅發現，推陳出新。

科學方法，其實就係一個反權威；至少，係一個人人都有平等嘅地位去挑戰權威嘅精神。

咁，大家知道點解神奇國度入面無真正嘅科學精神；因為人嘅地位，決定咗佢嘅音量大小。

當然，歐美社會文化，亦唔會係絕對地咁科學精神。現代，都只係得三幾百年歷史，人始終有啲本能上嘅意識，唔係咁易改變。呢個亦係點解，近年越多越多人研究非理性行為嘅規律，亦即係所謂嘅「行為經濟學」。

【題外話】之前有位讀者叫我推介啲關於「行為經濟學」嘅書；而其實更聞之前都有諗過開一個系列專講 cognitive biases ，但一直拖延症發作。我對呢個範疇感興趣，原因係我想刻意咁去建立新嘅生活習慣，去令自己做嘅決定更少錯誤，做嘅事更有效等等。

到處都有陰謀論，東西方都有；但我發覺，中文嘅世界，陰謀論不但係有市場，而且係主流。

正如以上所講，雖然稍為讀過吓書嘅人，都應該有接受過科學方法嘅教育，但真係可以「內化」成為價值觀一部份嘅人，應該唔多。

如果真係會用「科學方法」去思考，就唔會開口埋口就「覺得」，亦唔會咁鍾意估呢樣，估個樣。最低限度，當一個人講啲自己嘅感覺，又或者係純粹靠估嘅事嘅時候，會再三強調，呢個只係個人感覺，又或者係猜想。

唔會將自己所想像嘅，實牙實齒講到好似一定係真嘅一樣。

另一點，更重要嘅係，陰謀論永遠都可以自圓其說，陰謀論係無論如果都推翻唔到。

唔係講笑，任何政權最唔想就係被「推翻」；所以政治嘅世界，特別多呢啲可以自圓其說，不能被推翻嘅論說，有啲直頭就係陰謀論。

其中一個避免自己成為陰謀論者嘅最直接方法，就係唔好中二病，唔好有國師病，唔好成日諗「人」，唔好以為係英雄造時勢。

相反，了解制度係點樣漸漸演化出來；相信係時勢造英雄，換轉係其他人，同樣環境下做嘅決定大同小異。

我知，呢種想法好似好極端；因為，我哋都希望可以仰慕英雄豪傑，唔想接受人嘅存在原來係咁卑微，咁微不足道。

更接受唔到，原來成功嘅背後有好大程度係運氣，即係：「適當嘅時候，出現在適當嘅地方。」

又例如，香港班小粉紅、藍朋友、獻世派，又憑乜嘢去話韓國七欖事件，一定係「背後有人搞事」？

再數遠少少，由 2004 年開始，俄羅斯嘅民族主義份子就開始話，北非、中亞至東歐嘅革命，係歐美背後策動嘅「顏色革命」。呢個講法，北京都有信徒。到 2014 年，就連香港都有一班人認為，顏色革命係真嘅。

其實只要眼界闊少少，就見到那怕係歐美都一樣有股新嘅民族主義狂熱。顏乜嘢色革命？如果有讀過下近代史，就知道知識嘅普及、大眾媒體嘅演變，呢啲全部都牽動現代嘅民族主義。

以上嘅陰謀論，你逐件去辯論係無意思；就算有理有據，佢哋都仍然會話：「背後唔係咁簡單⋯⋯」「寧可信其有呀⋯⋯」「你點知唔係呀？」

「我覺得背後一定有陰謀。」而呢個文化就係咁，繼續沉淪於終日疑神疑鬼嘅精神錯亂當中。

先祈唔好睇少呢種文化落後嘅影響。當一班人心信個世界處處都係機關同計謀，佢哋嘅行為不但會變得鬼鬼祟祟；更進一步佢哋會到處煽風點火，將本來唔存在嘅陰謀詭計變成事實，只不過係主角變咗，變成佢哋自己。

呢種人，心地唔會好；所以，我會敬而遠之，可以唔需要接觸呢種人，亦盡量唔好去接觸佢地。

希望呢度嘅朋友，都係理性，心地好嘅人。