技術、勤力、運氣，邊個重要啲？ (Patreon)

【是日隨筆】近來睇咗啲乜嘢書？

01，正所謂諸葛一生惟謹慎；我相信，成功唔可以複製，但錯誤係可以盡力去避免，至少唔好重複犯錯。

02，假如真係成功，要記住，就算畀多一次機會自己，結果都未必係一樣。所以，更加要記住，成功，必然有運氣嘅成份。

03，當然，失敗都一定有環境因素，一定可以賴自己運滯。但如果係重複地錯同一件事，就唔係運氣同環境因素，而係個人無長進，無從失敗中吸收教訓。

04，錯唔緊要，最緊要係唔好一錯再錯。好多事都唔可能預知結果，唔做出來都唔知得定唔得；呢啲係學習機會。人必須試新事物，而且係要有系統，有目的咁去試。

05，大家知唔知，效率嘅最大敵人係乜？懶？懶人有時就係因為想快手快腳收工，所以先係最有效率嘅人。開估喇；效率嘅最大敵人，係成日都去試新嘢嘅人。信我，作為嚴重拖延症患者，呢個係我嘅懺悔。

06，反之，假如只係想有效率，純熟到好似機械咁，多快好省咁啤製大量生產，結果做出來嘅事就係零創意、無進步。短時間內，量產係可以搵多啲，但應變能力會差啲，長久而言嘅存活機率又會低啲。

07，所以，試新嘢同專心做熟悉嘅嘢，係應該要有個比例。咁個比例應該係幾多呢？一半？八二開？有冇聽過 37% Rule？

08，舉個例，你已經好忙，唔夠人手做嘢，但增加人手，見 candidate 一樣要花時間。數學上，究竟應該用幾多時間去做決定？係咪第一個來見工就請？又會唔會怕後面又可能好啲喎？但見晒咁多 candidates 先決定請邊個，又好似太浪費。

09，37% Rule 嘅意思係，最初見嘅 37% candidates，都係參考對象。37% 之後，只要見到同之前頭 37% 入面最標青嘅，就請佢喇。

10，用人話解釋就係：當你見過個 pool 嘅 37% ，你好大可能都見識過整個 pool 好同差；用呢個做標準，你有最大機會請到最好嘅人。強調多一次，唔一定保證係請到最好嘅人，但數學上機會係最大。當然，亦會有人錯重點，話可唔可以做 screening 先呀等等；當然可以。我只係想用一個例子說明，從數學上嘅或然率計，37% 係一個 good enough 嘅做法。請記住，人生係 optimization 而唔係 maximization 。

11，以上嘅 37% Rule ，其實係我睇 Algorithms to Live By 嘅時候見到。當時揀呢本書嘅原因，係想微調自己。我嘅發現係，自己就因為經常去試啲新嘢。花太多時間去諗題目，搵資料，以至同一個時間好多火頭。當然，好處就係呢啲跨領域嘅知識，橫向咁集合，有時會搵到新嘅觀點，但代價就係效率好低。

12，另一個我有嘅嚴重問題，就係往往錯誤估計自己做一件事要用嘅時間。以為可以用一個鐘頭搞掂嘅，結果用六、七個鐘。以為要用六、七個鐘去做嘅，又可能一個鐘搞掂。估錯時間會令人 set 錯 priority ，但更大嘅問題係好消耗精力，另一邊廂就激發我拖延症發作，直頭唔想開始做一件事。

13，從我嘅工作效率問題，延伸出嘅係個更深層次嘅發現，就係呢種錯估工作所需時間，其實係非常普遍嘅意識偏差（Biases）。

14，講開又講，之前有個讀者問我行為經濟學有乜書推介，我諗到都係啲行貨嘢，例如 Dan Ariely 嘅 Predictably Irrational ，又或者 Daniel Kahnemen 嘅 Thinking Fast and Slow 。

15，最簡單嘅講法就係，好多生物上嘅直覺，其實影響咗人對環境（甚至自己）嘅判斷。但如果用個人嘅體會去講，我會話人有種傾向係只會見到自己想見到嘅「事實」同「證據」，呢個亦係眾多意識偏差嘅根源。

16，呢個系列，本來仲有本書想重點推介。Maria Konnikova 寫嘅 The Biggest Bluff ，表面上講嘅係運氣同技術，究竟點樣互動，但其實係講人有幾多種唔同嘅方法，去高估自己，有幾多種不理性，同埋人嘅行為點樣出賣內心世界。

17，Konnikova 寫呢本書嘅背景，就係因為運滯；當時佢嚴重敏感發作，阿媽又失業，外婆又過身，自己份博士論文搞來搞去完成唔到，為咗尋求突破，作者走咗去拜師學打 No Limit Texas Poker ，最終仲差少少真係參加世界級嘅比賽，但點知臨門一腳，唔知係唔係食物中毒，要退賽。

18，完成唔到博士論文，但用一年時間成為話事啤高手，仲寫本書，吹咩？當然，再強調多次，睇完呢本書未必可以做到話事啤高手，但佢入面犯過嘅錯，能夠避免得到，做人已經行少好多冤枉路。

19，從 The Biggest Bluff 我諗到一本都可以同時間去讀嘅書，就係 Garry Kasparov 嘅 How Life Imitates Chess 。一來係我好欣賞佢，二來就係捉棋可以話係同打啤係兩個極端；捉棋係所有資訊都響棋盤上面，對弈雙方完全無資訊不對稱，打啤就係一日未開底牌，全世界就得你一個知結果。所以，我好想將呢兩本書對照。

20，但係一直都未開 Kasparov 本書，令以上嘅組合拳唔齊整，結果拖咗成三個月都無寫到呢個系列。

21，關於做決定，仲有本 Don't Trust Your Gut ，都有幾多觀點，但係我對大數據呢回事，有一點保留：人生唔係咁多決定可以用數據做參考，因為好多決定，一生人可能只會做一次；所以有啲決定，統計學上有分別，但係每個人都唔會從統計角度去睇自己嘅人生。反而係啲成日做，日日做，不停做，不停地影響我哋嘅習慣，因為影響係日積月累，少少統計上嘅分別，可以令結果差天共地。

22，所以，亦唔爭在可以加埋 Chip & Dan Heath 寫嘅 Decisive ；呢本淺白咁從科學角度，解釋點樣做更好嘅決定。

23，【同場加映】過去幾個月，睇咗兩本書講點樣「生意越做越大」。第一本係 Andrew Chen 嘅 The Cold Start Problem ；另一本係 John List 寫嘅 The Voltage Effect 。用時下嘅 MBA 術語，呢兩本書都係講點樣透過自我複製成功，而去無限擴充。但正如一開始所講，因為我相信，成功唔可以 100% 複製，所以呢兩本書雖然早就睇完，我都覺得值得一讀，但就係無乜動力去寫導讀。

24，【同場加映】最後，仲有讀者點名想我評吓 Ray Dalio 本 Principles for Deailing with the Chianing World Order 。我睇咗啲，直覺係內容如果同 Barton Biggs 生前所寫嘅 Wealth War and Wisdom 對比，會幾有意思。兩個都係講對

以上，就係今年第三季帶到落依家仍然未有 closure 嘅學習、寫作目標。話咁快，又十一月喇；無乜事我都係返出去做嘢先。暫時用呢份讀書報告頂住癮先，有拖無欠 🙇🏻‍♂️