解放軍的超限戰與認知戰 (Patreon)

有前輩提醒我，要了解中共，其中一個最好嘅渠道係日本嘅分析。每年日本防衛省都會發佈由「國家防衛研究所」編制嘅年度報告。

China Security Report - The National Institute for Defense Studies (mod.go.jp)

今年嘅報告有三大部份：一，解放軍嘅改革；二，中共嘅認知戰；三，中共在海上灰色地帶嘅操作。

報告嘅內容，有精彩嘅地方，但更精彩嘅係字裡行間無講到嘅含意。呢份報告嘅分析，我就唔寫長篇大論喇，直拍片講畀大家知。

當然，幾個重點都會用文字列舉畀大家睇嘅：

01，首先要問，呢啲報告畀邊個睇？如果係政府內部參考，就唔需要放上網喇。呢啲「打開口牌」嘅行為，更重要係話畀對家知：「我知你做緊乜。」所以，有一定把握先會公開，如果唔係都幾老土。

02，報告第一部份講「解放軍現代化」：「多少都有啲超限戰嘅意味喎；但我哋知，解放軍係為黨服務，明嘅。」我解讀嘅意思係：「日本明白，解放軍首要任務係對內嘅統治。」當然，何謂「對內」，就可圈可點。台灣算唔算內呢？

03，報告第二部份講「認知戰」；大部份內容都唔具體，但唯獨講俄烏戰爆發後，中共點樣對台灣發動認知戰，呢部份就好具體。即係話，日本表示知道中共點對台灣。

04，我嘅延伸推論係，中共從來都只係想台灣人相信；假如台獨係唔會有人幫台灣，所以都係傾和平統一喇。當然，中共亦都想全世界相信，佢要武統一定得。但事實呢？未打邊個知。

05，就正如好多人覺得烏克蘭一定唔夠俄羅斯打一樣；嗱，呢場仗就真係拭目以待。但日本揭露中共對台嘅心理戰，某程度上都揭埋另一張底牌：「中共唔想 / 敢打。」

06，報告第三部份講中共在海上灰色地帶嘅操作，尤其係用民兵，非正規嘅部隊。揭呢張底牌，我認為效果都係一樣，就係同中共講：「知你唔敢動真格；明嘅。」

07，當然，唔信嘅人可以話份報告一廂情願；但我都叫做畀多個角度大家睇，以及分享我嘅閱讀方法，以及我欣賞呢份報告簡短又獨特嘅推論方法。