賭聯匯唔脫勾期權點運作？參與嘅人有乜風險？ (Patreon)

世界上無必賺嘅賭局，唔會有無風險嘅投資，究竟點解有投資銀行願意畀 14% 年利率去同人賭聯匯脫勾？

投資銀行嘅盤算係乜？呢班落搭嘅富戶，究竟又係參與緊一場點嘅賭局？

01，首先，如果大家唔熟悉期權，簡單咁講就係有 long vs short、call vs put ，加起來就有 long call、long put 、short call、short put 四招，而四招又可以組合成唔同嘅策略。外面有好多人教，多都都係教人點賭錢；呢啲就留返大家自己發堀。其實一啲都唔難，只要慢慢諗就明。

02，今次呢間中資行叫啲客做嘅，就係同時 short 一對港美元嘅兌換期權，行駛價分別係 7.75 同 7.85 ，亦即係所謂嘅強、弱方兌換保證。再簡單啲咁講，就係只要係期權嘅有效期內，港匯唔超出 7.75 到 7.85 呢個範圍，你就穩袋呢筆期權金；而期權金嘅利潤就係一年 9% 息左右。

03，另外，銀行就叫埋個客，不如將筆錢做埋定期，加多 5% ，合共 14%。我甚至懷疑，再問埋銀行借做多一轉槓桿都仲得；畀息，賺少啲囉。

04，正如一開波講，天下間無必然賭局，無必賺投資，所以，賺少啲其實即係更高風險。所以，無死錯人嘅；問題係投資銀行賺啲乜？對賭嘅另一方又睇緊啲乜？

05，先講投資銀行，有啲人第一個問題就係點解呢個玩法由中資行提出。我好直覺咁相信，原因簡單不過：「中資行最多呢啲客。」係喎，大家睇電騙最多中招嘅係邊啲人？下下都千千萬咁畀人呃，你估吓邊啲行最多呢啲客？又引述吾友李聲揚嘅名句，香港人真係好很有錢。

06，通常投資銀行唔會同個客直接對賭；傻咗咩，我講啲客呀。明知個賭場門高狗大都以為自己可以打爆個庄？唔好中二病喇。我相信係有客周街問有冇得買港匯脫勾嘅期權，投行自然有人搭路去搞。

07，做銀行，最重要緊要係乜？係派貨嘅能力。呢個亦係點解大戶咁重要；唔通真係招呼你班零售客咩。零售銀行一早就變成社企；如果唔係有信用卡同各種借錢，真係唔知點做零售銀行。

08，所以，投行都只係中間人。做呢單先賺差價，如果個客借錢玩，賺多筆。更正係如果到時個客要接港紙買美金，又賺多筆。投行無死錯人，輪嘅一定係個客；當然如果個客賺，投行都唔會輸。

09，對家呢？對家都係槓桿買聯匯會脫。但要留意，對家嘅風險係有限嘅，就係擺低嘅期權金。但呢筆期權金賭嘅係，未來一年聯匯有機會穿兌換保證。其實呢件事舊年發生過；中一次就夠。

10，另外，過去嘅慣技係，到時現貨都會借港紙沽買美金，同時沽期指。只要香港嘅短期資金成本升，現貨股市、股票期貨都跌，呢邊賺返嘅遠遠可以冚晒之前筆期權金嘅數。但如果連港匯都穿埋兌換保證，就好似一條三重彩咁，好好分。

11，但唔中三重彩，都可以有條連環；再唔係獨贏加位置都有一注（港股、期指）。所以，對家對賭緊嘅好多家，唔係淨係同你賭；不要睇到自己咁大。

12，好喇；對家又睇緊乜呢？一，睇你今年財政預算案個財赤好難睇，明年一樣咁難睇。聯匯之下，香港唔可以有財赤；有結構財赤就一定要脫勾。無得揀。所以，都可以預期今年第二、三季，又到講鬼故嘅時候。

13，我可以好大膽講：「今年內聯匯一定唔會脫勾！」唔服可以 side bet ；唔駛咁煩，賭餐飯，聽者有份。

14，但延伸另一個聯想就係，睇怕港股自舊年十月底開始嘅升浪已經玩完。我好少 make 呢啲 call ，一年一次半次。上次就係 2022 年第三季叫大家唔好睇港股太淡。

15，最後呢個送嘅：見到班啟德苦主，我彷彿見到啲買咗妖股嘅股民。每次泡沫爆破嘅第一波，都必然係「可憐之人必有可惡之處」。樓市如果真係有咩依郁，呢個城市最少衰三年。 剛才講，泡沫爆破嘅時候，好多人要沽貨套現補倉，呢個係必然要出現嘅調整。

好，聽日嘅題目都諗埋：「聯儲局政策前瞻」有乜問題趁早問。

另外，有邊位對 Out of Control 嘅讀書會有興趣，PM 我 🙋🏻‍♂️