2023 年聯儲局動向 (Patreon)

Published:

2023-02-10 08:01:08

Edited:

2023-02-10 08:41:43

Imported:

2026-08

Tags:

美元美國聯儲局聯邦儲備銀行貨幣政策

Downloads

呢條題其實係有少少取巧，因為成件事最易講就係呢部份：「以目前嘅預期，聯儲局會再加多一次息，由 4.5 - 4.75% 加到 4.75 - 5%。

但知道咗又點？

入正題前，先畀返 WhatsApp / Telegram 會員專區嘅連結：

01，想知加唔加息？唔需要聽主席理事講啲乜，只要去紐約聯邦儲備銀行嘅網站，每日都有公開市場操作嘅數據，而且係好容易閱讀，一啲都唔難明。

02，入面嘅 Federal Funds Data ，有每日嘅銀行同業拆息嘅成交價（即係借入同借出美元嘅利息）。呢個係市場水平，而最後一欄，就係聯儲局嘅「目標利率」，即係如果市場有資金不足嘅時候，聯儲局會以最低幾多息率借出美元；目前就係 4.5 - 4.75%。

03，但你會見到有 99th percentile 一欄，有啲會超出上限嘅；有銀行開呢個息，又有人肯借，咁呢個叫市場現實。目前係 4.85 厘，即係高過聯儲局嘅目標利率嘅 4.75% 少少。換句話說，下次議息，會加到呢個水平。直到市場成交嘅水平，同聯儲局嘅目標水平一致。

04，所以，唔需要聽邊個講，睇數字就可以；但我唔建議大家咁做，因為其實無乜用。知道下次開會加息又點？全世界都知喇。另一個方法係睇利率期貨，其實亦一早反映晒。到最終揭盅嘅一刻，根本無任何獲利嘅空間。

05，真係要賭，就只可以賭啲不能預期嘅事。但我個人好唔鍾意呢種心態；之前都有講投資不是投機。投機就係買 / 押注 / 賭呢啲你控制唔到，甚至無人控制到嘅事。人生已經有太多事不由自主，做乜仲要令自己更受「運氣」所控制？

06，投資係回報率嘅套戥，你嘅資本成本係 x 厘，收租可以係 x+n 厘；呢啲叫搏得過。但呢啲機會要搵，唔係咁易搵。但又可以話到處都有，重點係心態上要盡量知道每件事嘅成本同潛在回報係幾多。某程度上都係藝術。

07，所以，知道依家嘅息率係幾多，大概都係畀自己有個指標去了解，要有幾多厘嘅回報，先為之值搏。當理論上無風險嘅美國國庫債券都派息高過一個所謂嘅「投資」，呢件事就好明顯有投機嘅成份。呢個題目，下星期再講。

08，講返聯儲局，如果今日大家只係記得一件事，就係：「其實聯儲局某程度上都係被動，都係受市場對美元供求而調節貨幣政策。貨幣政策對市場嘅結果有影響，但唔係絕對精準嘅控制。係兩回事。」

09，另外，聯儲局嘅首要工作，係確保銀行唔會執笠；如果當央行決定由得銀行執笠（例如雷曼），就一定要確保唔會成個銀行業都死晒。呢個亦係每次金融危機嘅教訓。又留返下次講。

10，最後，就係可以見到自從 1980 年代之後，聯儲局隨著世界經濟越來越「金融化」「槓桿化」，短中長息「易跌難升」，究竟呢種現象，除咗代表債同錢之間嘅關係越來越模糊，仲有啲乜嘢意義呢？長遠又點樣影響我哋嘅投資 / 投機行為呢？又係下回預告。

11，今次要記著另一件事，坊間啲市場緊張大師，嗯，無乜參考價值。就好似我手上本 Bloomberg Magazine 咁，我都係去廁所嘅時候要來睇吓的公仔同平面設計。（擰手機入廁所太唔衛生喇。）

好，下次再會。又或者，有乜問題，呢度 PM 又得，去 WhatsApp / Telegram Group 傾，又得。

鍾意睇片嘅朋友，呢條係 Youtube 嘅 Private Link

我專登係呢度上 Audio 方便用 App 嘅朋友聽；鍾意睇片嘅，又有片睇。一次過滿足晒文字同多媒體嘅願望，Yeah 。