讀書會 📚 (Patreon)

科技發展咁快，學習新知識亦變得越嚟越重要。但除咗買書睇、睇新聞、睇 YouTube 之外，究竟仲有啲乜嘢方法可以令我哋嘅學習更加有效呢？

近來越來越多朋友組織「社交學習」嘅小組，聽落係有少少 buzzword ，但個概念係透過人與人之間嘅交流同，互相學習、討論、分享知識，從人身上學嘢，應該係人類最原始嘅學習模式。

退一萬步咁講，反正都係社交，不如識啲志同道合嘅人；大家共同目的，就係畀自己有增長見聞嘅機會。

經過幾次實驗，我覺得都係時候將「讀書會」呢件事「恆常化」；畢竟，每日開 YouTube Live 、錄 Podcast 、又或者寫文，都係畀我一個機會去感受社會氣氛，同埋自我宣傳，但我最想做嘅事始終都係（一）令自己不停進步；（二）建立一個真正有互信有交流嘅香港人社群。

呢個就係「讀書會」背後嘅精神，同埋如果有一個好遠大嘅諗法，我希望香港精神唔係只停留於某一個時空，而係一個生生不息，可以為世界帶來價值。

加入讀書會

從個人層面，我希望呢度嘅學習，可以理論同實用並重。

但我都知，自己嘅傾向係著重原則多於具體嘅資訊。因為我始終相信，唔同人面對唔同嘅處境，只有當事人明白事情背後嘅原則，先至可以唔駛次次都係出事時，先去問：「咁點算呀？」

又或者，另一個比喻係：身體唔舒服要睇醫生，但簡單嘅健康生活習慣，其實可以令人少啲病痛。

延伸以上嘅比喻，時下 social media 啲垃圾資訊嘅泛濫，就同垃圾食物一樣；食得多，對身體最大嘅影響，就係只累積大量嘅「能量」（資訊），但唔知點用，唔識發揮，最終就變成唔識郁嘅脂肪。

訓練身體機能，目的唔係單純要消耗呢啲脂肪，而係令我哋更明白自己嘅身體，學識點去運用控制每條肌肉。學習嘅意義都係，唔係在於識更多人，而係更了解自己點樣思考，甚至乎可以幫自己安裝一啲分析事情嘅工具。

進步，其實就係為自己個腦，upgrade 操作系統，又或者加啲有用嘅小程式；用呢個比喻去睇，呢期係有需要做大 upgrade 喇。

另外，我對「專家」呢種概念，其實有啲反感。首先。各位「專家」，對唔住；如有冒犯之處，請多多包涵。唔係話唔欣賞人哋對一件範疇嘅事投入時間同心力，但我嘅經驗係天下間無知識係獨立於其他範疇。

好多我接觸過嘅專家，其實只不過係唔願意走出 comfort zone 嘅人。又用機器做比喻，好多所謂專家就只有一個功能，好似以前啲計數機，每個功能都有個特定嘅掣。但新嘅智能乜乜，最重要嘅特點就係可以 upgrade 。

「讀書會」嘅另一個特點，就係無既定嘅「科目」；之前我特登買落 unsubject.com 呢個網域，正正係呢個原因。

最後，坦白講，我其實唔係好知道應該去點樣組織呢件事。暫時計劃就係，每個月，我哋會揀一到兩個主題，再揀幾本書嚟一齊去讀，然後由我帶領大家進行討論。每次開會前，我都會提供啲相關嘅資料。

就好似返大學 tutorial ，我都幾肯定，一定會有同學係唔睇啲 assigned reading 就上堂；但無壓力嘅，因為以前我都係咁，隨緣隨心聽吓，傾兩句，多少都有啲得著。總之，各取所需，各展所長。

利

加入讀書會

題外話：「讀書會」呢個牌頭好似有少少「趕客」；但暫時我又諗唔到有乜嘢更好嘅形容，歡迎大家畀啲意見。 🙇🏻‍♂️