【隨筆】港聲你聽 (Patreon)

用香港人的聲音連繫全球港人

唔怕坦白話畀大家知，除咗有重度拖延症，其實我亦有輕度嘅社會不安障礙；我好怕同人接觸，絕對係搭小巴唔敢哎「前面有落」嘅個種人。

「前面即係邊度呀？！仲有兩個街口你咁早哎我點記得？！禁區呀！抄牌你畀呀？！」總之，我自己做緊嘢嘅時候，好怕畀人中斷，司機開緊車我都唔敢滋擾佢。

又可能我諗多咗。

所以當我開 Live 嘅時候，有人留言，本應好歡迎。但我嘅感覺就係好似一個揸緊紅 van 嘅司機，後面有好多乘客不斷問禁區前可唔可以落車。

「趕住交更呀！總站先落喇！」（紅 van 有冇交更㗎，請問？）

就算以前返工，我都盡量避開的同事；例如我會等佢哋放工先至返工，又或者趁佢哋未返工，我就返咗先，當佢哋「浦頭」嘅時候就輕輕地同佢哋講一聲：「我去閉關喇。」

然後就走行上雪廠街外國記者會「打躉」。當然，外國記者會係唔會有人滋擾我；可以幾點鐘一個人，一粒聲都唔出。

所以，自從 2020 年離開香港，深居簡出，真係無乜唔慣；讀書寫文，呢幾年諗過嘅問題，可能多過從前咁多年加埋。

如果活在古代，我絕對可以係隱仕；學陶淵明話齋：「好讀書；不求甚解；每有會意；便欣然忘食。」

但係，我又覺得人總唔可以對個世界無貢獻。更重要係學習真係唔係自己一個人嘅事。所謂「十年磨一劍」，「閉關練功」，係自欺欺人。

最好嘅學習，係有目的嘅咁去學；而我嘅目的就係將一件事，用最多人能夠明白嘅方法，表達返出來。

Unsubject

過去幾年，又究竟接觸過啲乜嘢題材？

我發現最多係歷史。其實我對歷史嘅觀念，都幾受進化論嘅影響。借用 Dobzhansky 嘅講法 - nothing in biology makes sense except in the light of evolution 。歷史，亦如是；自然環境、經濟同科技發展等嘅轉變，先至係影響人類歷史最重要嘅因素。

我知道呢個係一個有少少非主流嘅觀點，但我希望有更多人可以從呢個角度去了解歷史，而唔係榕樹頭講故，講吓英雄同壞人。我成日強調，歷史唔係英雄做時勢，而係時勢做英雄，因為如果相信咗英雄做時勢，就好容易忽略咗宏觀嘅環境。

人，只係好渺小嘅存在。每個人受環境嘅影響，一定大過任何一個人可以對環境造成嘅改變。

我知道仍然有啲人相信，只要有英雄嘅出現，呢個世界就有救。都等咗幾千年，仲等救世主？

當然我亦都好明白，呢種想法係人認知上好自然嘅傾向；又或者簡單啲咁講叫：「人之常情」。

但點解人要學習？為係因為我哋要克服呢啲所謂嘅「認知偏好」。否則，人就永遠都停留於感覺嘅層面，同動物無分別。

思考，係明文嘅基礎。

有人將思考提升到藝術嘅層次，但我就膚淺啲，相信思考係方法。方法，可以學。但點學呢？首先，係應該要知道自己係點思考；要識得分有啲乜嘢係自己「覺得」係「不證自明嘅真理」？

如果一個人了解到自己係點樣去思考，仲有一個最大嘅好處，就係好易就明白到其他人係點樣思考，點樣去睇呢個世界。

我開 YouTube Live 嘅時候，成日都話我只係嘗試去解釋其他人係點樣睇事情，唔代表我一定贊成或者唔贊成。

當然，我都有自己嘅睇法；尤其係遇到啲明顯係語意不清，概念含混，又或者邏輯有漏洞嘅講法，我都會直接咁去講返點解呢啲觀點有問題。希望各位明白，我哋網上嘅相遇，就只係演算法同緣份嘅結果；有時我嘅語氣表現得好唔耐煩，係因為我係一個好怕 思想中斷嘅人；就好似專心開車嘅紅 van 司機。

希望大家明白，我唔係針對提出問題嘅觀眾。

除咗歷史、政治同時事，另一個我都經常講嘅題目，就係經濟學。

呢個範疇，我形容好似少林功夫；唔係天下武功出少林，而係好多唔同科目嘅人、知識，都聚首呢一科。有啲人覺得經濟學好霸道，但其實只係呢一科著重方法而唔係立場，所以能夠普及應用於唔同嘅地方。

當然，經濟學都有主流同非主流。我諗，我都算係非主流。亦好坦白咁講，我唔係「專家」，更無志願做專家。但呢門學問的確有佢值得去學習嘅地方，尤其係高手嘅思考嘅方法，同紀律。

我遇過最欣賞嘅經濟學家，佢哋都係一出手分析問題，就見到佢哋用嘅方法。有人可能會話：「咁佢哋嘅分析咪千篇一律囉？」咁又唔係喎；就好似庖丁解牛咁，見高手將招式揮灑自如，旁人見到係賞心悅目。

思考方法同呢種紀律，可以去到被欣賞嘅水平，其實都算係藝術。

另一門學問，我覺得係要畀啲心機去學，就係心理學。

好多人對心理學，覺得係偽科學；而呢一門學問，近年亦都被揭發好多做假，又或者實驗方法有問題。另一個極端，就係啲「流行心理學」（pop psychology），例如啲咩 MBTI 、 Big Five Personality ，乜嘢人同乜嘢人最夾之類。

心理學呢門學問最有趣嘅地方，係設計實驗嘅方法同創意。

「你點知其他人其實係點諗？」「甚至乎你點知佢係唔係真係有諗過先行動？」「人嘅腦袋入面究竟點樣處理感觀嘅輸入？」

以上連串問題，過去畀人覺得只係學術討論，甚至係有少少不著邊際嘅哲學題目。但到咗今時今日，心理學，我指係認真設計實驗嗰隻，其中一個最重要嘅工作，就係去了解人工智能，係唔係真係有「思考」嘅能力，係唔係有意識。

不論任何範疇，其實講深入少少，都會去到啲基本嘅問題，例如乜嘢係對錯是非，乜嘢係真，乜嘢係假。從前，呢啲叫哲學。但依家學院派嘅哲學，變成對哲學門派的研究，爭論越來越離地。

實情係，只要肯去諗問題，乜嘢都係哲學。

好喇，本來無諗過寫咁長。只係想賣吓廣告。

讀書會

讀書會其實都係剛剛開始。我想慢慢將自己寫文收費呢個模式（即係 Patreon / Substack / Unsubject），變成「代客學習」嘅社群。

Social Learning 理論上係好勁。

但點做呢？我都仲摸索緊。揀啲乜嘢題材？點樣揀？統統都係發堀中。

講聲你聽

另外一個我邊學邊做嘅事，就係講聲你聽。

港聲你聽 | Youtube

港聲你聽 | Facebook

呢個「課外活動」有幾件事好暖心嘅。首先當然係大家一齊去孕育一個創作嘅過程；當中大家嘅信任同溝通，非常難得。我希望我哋呢個文化，可以維持落去。

另外，就係我哋嘅團員，由最初大家對製作一竅不通，到依家做到啲作品出來，好老套咁講，過程同結果，一樣咁重要。

之前我哋每個成員分享呢兩個月嘅感想時，大家都話好似一個神奇旅程；我哋散落世界唔同嘅角落，但因為製作廣播劇而連結一齊，希望港聲你聽，將會有自己嘅生命，繼續發展屬於香港人嘅故事同聲音。

題外話。最近見到有啲海外港人嘅社群有啲茶杯裡的風波，然後好快就有人跳到「劣根性」呢個萬能 Key。雖然我唔知內情，但以我對於搞組織呢件事嘅理解，好多時，當一班人聚埋，但又無一個明確嘅共同目標，就好易發生無謂嘅爭端。

所以，如果唔係先有目標再建立社群，而係諗往先建立社群再「搵啲嘢搞吓」，十次有九次都係不歡而散。

港聲你聽 除咗係要用香港人嘅聲音連繫世界各地香港人，我相信更重要係組織公民社會嘅經驗。

香港人嘅公民社會質素，我相信可以好高，重點係組織入面每個人，都要好清楚組織嘅目的。常言道，culture eat strategy for breakfast ，組織嘅文化先係最重要。搞非謀利，有時難過搞生意。

當然，如果可以令到非謀利嘅組織，有可持續嘅資源，就更加難。

但呢個挑戰好正喎！我覺得呢個係一個感召，畀咗我一個新嘅目標；雖然咁講，我仍然擺脫唔到我拖延症同社會不安障礙嘅兩大問題。

最後，再次多謝 港聲你聽 嘅一班兄弟姊妹。之前將呢篇文嘅初稿同佢哋分享，即刻同我講：「冇問題！有我哋喺度！」

港聲你聽 將會有更多搞作，有興趣嘅朋友，希望可以先訂閱我哋嘅 YouTube 、加入我哋嘅 Facebook。

港聲你聽 | Youtube

港聲你聽 | Facebook