仁者無敵？ (Patreon)

【是日隨筆】由「不招人妒是庸材」到「一個小器鬼的自白」

早幾日有感而發，寫咗個 Facebook Post ：

利世民 - 如果無黎智英，可能我唔會寫嘢；寫亦都未必有人睇。... | Facebook

呢啲隨筆，都係為咗幫自己 offload 腦海入面嘅念頭，未必有乜特別嘅目的，未必有乜嘢想講；只係將心入面把聲轉成文字，就好似 ChatGPT 咁，一隻隻字 dun 出來；呢種專心，過程同洗碗、吸塵差唔多，好 meditative。

當然，今日呢篇嘅性質都係類似；甚至所有以前，以後嘅「是日隨筆」系列，都係咁。我希望就算無開 live ，無正經題目寫，都幫自己治癒一下。

今日我最想 offload 嘅諗法，其實係回應之前個 Post 嘅留言，有位讀者留咗個問題：「仁者無敵？」

細個嘅時候，我覺得「仁者無敵」呢個講法好奇怪：「有幾無敵呀？」當時，中二病嘛，對無敵嘅理解係「打遍天下無敵手」嘅個種無敵。

大個少少，當然知道所謂嘅「無敵」嘅意思係：「我沒有敵人」。

「你唔當人係敵人，但人哋可以當你係敵人喎。」

假假地都有人識，就叫公眾人物㗎喇，真係好易唔知乜嘢原因得罪人。以前我得罪人更多，甚至視為一種肯定：「不招人妒是庸才呀。」

依家好似好少少；原因我自己覺得，就係之前個 post 入面所講咁：

（一）如果係觀點嘅不同，就當觀摩其他人嘅睇法；如果係發現自己 / 人哋嘅事實有誤，好好地平心靜氣去對待。

（二）盡量留意自己寫乜、講乜係唔係出於善意 。

（三）最後，亦都最重要，就係記得：「做人唔需要成日證明、肯定自己。」

成日都要證明、肯定自己嘅人，不但好易傷害別人，更經常傷害自己，呢個係 social media 常見現象。

唔怕講個秘密畀大家知，我唔係一個咁大方嘅人。

如果有啲好充滿敵意嘅人留言，我其實會幾上心，會成日諗住。唔係話想報復又或者搵交來哎，因為我知道係無結果，邊個都唔會說服到對方。我甚至覺得，踩場嘅人，又或者背後講人嘅人，根本就係希望你個心覺得唔舒服。

當我諗到呢度，又諗起自己以前可能都做過類似嘅事。所以，都係算罷喇，Block 晒佢哋就算。

Block ，又算唔算係逃避問題呢？有冇人可以真係無敵人呢？

有段日子，有條友，其實識嘅；佢辰時卯時就好似要挑戰吓我咁，硬係好似要落我面。

我真心唔知自己幾時得罪咗佢，自問無做過啲乜；總之就係覺得佢好不友善。但一直以來，因為大家都叫「朋友嘅朋友」，二來我同自己講：「大方啲，大方啲。」

所以一路咁無視佢，敷衍佢。但每次見佢留言，都係咁充滿不屑。最終我次次都係心有戚戚焉。

直到有次連其他讀者都睇唔過眼，忍唔住問佢憑乜咁串串貢，佢話：「當 Simon 係朋友先點醒佢。」

朋友就唔係當嘅；係就係，唔係就唔係。既然大家都唔係咁熟，算，Block。

人哋點對我，我無法控制，但我點對人，就係我嘅自由。Block，都係我唔聽唔睇，當我蝕底囉，其他人嘅言論自由無受損，但我想照顧自己嘅感受。

但無諗過原來接受自己係一個小器鬼都有好處，自從 Block 咗啲 haters 之後，我發覺自己 productive 咗好多。唔扮大方，即係唔需要證明、肯定自己係一個大方嘅人，因為我唔係。

或者，「仁者無敵」嘅意思，只不過係咁解：「唔計唔小心得罪人，真係有同理心嘅人，唔會去刻意得罪人，唔會當其他人係敵人。」正如上面所講呢個人，我都只係為咗保護自己弱小心靈而去逃避佢嘅針對，我又唔會刻意去還拖，更唔會當佢係乜嘢。

總之，你唔放過我，唔代表我唔放過你。

雖然，見到令自己感覺唔舒服就 Block 人，我都會擔心自己個世界越來越細，最終活在同溫層入面。但我更唔鍾意個種心有戚戚焉嘅感覺。

我認，我未有寵辱不驚嘅修為。係喎，人哋讚，我其實都會唔自在；當然面對其他人嘅針對，就更加唔舒服。諗返轉頭，有呢種矛盾，應該係對自己唔係咁肯定，正面啲咁諗，我都唔係咁自大嗟。

好喇，講咁多先，下篇再見；又或者 Live 見。