【是日隨筆】 被政治耽誤了的創業家 (Patreon)

大家見我唔講單官司，係有原因嘅。一來，報道大家都會去睇，我亦冇嘢補充。二來，單案仍然審緊就唔方便亦唔應該太多評論。

歷史自有公論。

但呢幾年我覺得好似過得好快，但又好似發生好多事，轉變好大。我指嘅唔只係香港，而真係個世界。諗返幾年前自己嘅工作，當時嘅世界，同依家嘅工作，依家嘅世界，真係好似兩個世界。究竟係個世界變得越來越快？定係我哋設身處地嘅感覺太真實？回想起廿年前、三十年前，世界亦都變得好快。可能，世界從來都變得咁快，無快過，亦無慢到。

歷史，亦充滿令人意想不到嘅變化。

唔講單案，只係講我認識嘅老闆兼師傅黎智英。我可以大膽講，佢係個被政治耽誤嘅創業家；佢嘅興趣首先係食，其次係做生意，我同佢打工咁多年，95% 嘅交流係講生意同科技，有時會講吓同事嘅八卦嘢（佢份人都真係幾八卦），另外多數就係啲九唔搭八嘅吹水嘢，好少講政治，十隻手指數得晒。

點解我哋唔講政治呢？原因係，我覺得，我哋心目中都相信，要為最多人謀求最大嘅價值同利益，就梗係做生意，尤其係好似媒體呢類咁 scalable 嘅生意。其實 2014 年之後，佢對媒體漸漸無興趣，更正確啲咁講，係對做內容無乜興趣，反而對科技嘅興趣大好多。做 software 同做 content 有好多相似嘅地方，亦有唔似嘅；似嘅地方，就係都好 scalable ，甚至公司嘅結構同文化都可以好似。

當然，唔似嘅地方都有好多喇。但聰明嘅你都應該見到，其實由壹傳媒到壹數碼，唔係無喇喇改名嘅。

不過，間公司最終無成功轉型；原因好多，內外都有。

再講多次，黎智英係一個被政治耽誤嘅創業家；佢最初嘅 fans，多數都係因為佢嘅生意手法而覺得佢幾有諗頭。

蘋果日報創刊嘅夏天，我剛剛中七畢業，等緊去美國入大學。當時諗，如果有一日可以幫黎智英打工應該會好特別。

真係，我夢想竟然成真。所以咪話，歷史充滿你估唔到嘅結局。

仲有一樣嘢，就係黎智英有時會有啲好無厘頭嘅堅持，例如佢好想做零售，好信 AI 同元宇宙。係喎，佢十幾年前都已經好想做 VR AR ，亦因為咁佢先至投資做壹動畫。佢近幾年好想乜都用 AI ，係，2017 / 18 年佢已經好沉迷呢啲方向嘅發展。

所以，佢真係唔係啲一般人所認識嘅傳媒大享，因為佢嘅理想係不斷嘅創新。

咁，仲唔係一個被政治耽誤嘅創業家？

香港雖然號稱一個資本主義社會，但大多數嘅財主都係收租佬、尋租者，好似黎老闆咁嘅創業家，少之又少，成功嘅就更少。黎老闆好多 fans 都係呢啲中小企嘅老闆仔，可能就係因為創辦完 Giordano 之後仲可以創辦壹、蘋果，佢證明咗香港仲有創業嘅空間，佢嘅成功亦畀咗小生意人一絲希望。

係，黎老闆真正嘅信念，係自由市場。

黎老闆好關心啲中、小企，唔係個種話要政府去做乜做物個隻關心，而係諗我哋可以做啲乜去 facilitate 啲小店。我最後嘅其中一啲 projects 好重要就係小店市場。呢啲豬頭骨無乜同事肯去做，甚至行內都無乜人做，個個諗賺錢就梗係大財團、中資，又有邊個會好似我哋咁會去諗微、小企？當然我哋畀封殺都對我哋有影響，如果唔係都唔會花咁多資源去開拓呢片藍海。

有樣嘢我好佩服師傅，就係佢雖然行得前，但方向係正確嘅。