1月風水小貼士 - 流月催異路功名方法 (Patreon)

今個月又有異路功名佈局，又係最唔受歡迎的佈局嚟，唔係話真係唔受人歡迎，而係因為佢個用途唔係人人啱用。

又解釋多次先，咩叫做異路功名呢？其實即係唔係正統讀書而得的名聲。例如，你讀書唔係好叻，攞唔到奬，但玩課外活動出色，考試科科唔合格，但打籃球你好叻好勁，喺學校無人唔識你，好似流川楓咁，呢啲就叫做異路功名喇。

咁啱，我個仔就係催咗異路功名，咁佢最近喺澳洲考咗個結他試考得幾好，但同讀書冇關係的。

又或者，你係做一定自顧人士，ＫＯＬ，網絡紅人，保險呀，賣樓呀，某行業或生意需要一些響亮的名氣，總之係好需要一啲名氣的，而又唔係官貴嗰種名氣，就都係叫做異路功名。

方法如下：

記住喺屋企搵出個中心點先，再用個指南針，搵出邊個位置係西南方。係呀，西南方又係冧庄呀！

放咩呢？

可以放九條紅色的龍，最好係用木造，如果冇或者太貴，買啲樹脂造的都可以。

唔捨得買九條咁多，咁買三條啦，如果都係嫌貴，咁買一條啦。

力量係因應數量多少的，越多效力越大，越少咁梗係冇乜效力啦。

日期：２０２２年１月１０日

時間：１０：００ＡＭ

又係玩大概一個月啦，跟手拎走佢。

如果呢段時間，咁啱係需要谷大自己名氣的時間，咁就可以試下。又係嗰句，有冇效果，除咗睇你自己屋企係咪風水OＫ，你個人都要帶點運氣的。

希望大家喺呢個月既時間，可以跑到個名氣返來吧。