好人壞人有樣睇？定係有八字睇？(六) (Patreon)

賤男系列？悶唔悶呀？又講成龍大哥？

係就係賤男，不過今次唔係成龍大哥，係佢啲friend啫。

今日分析一下，王力宏既八字，睇下佢係咪好快冇運行？

新鮮滾熱辣的新聞，係王力宏的太太，佢喺媒體度爆料，佢準前夫的所作所為，有興趣的朋友，可以去搵下，呢度就不再詳述了。

佢既命盤如下：

時日月年 

吉己癸丙

時巳巳辰

＜—————７

庚己戊丁丙乙甲

子亥戌酉申未午

己土生於巳月孟夏，最緊要以水來調候，癸水在月干，即係好似一片焦土，而有一陣雨露洒在大地上。巳火有辰土所泄，癸水根氣在辰中之中，而癸水也自坐巳火為金的長生，所以癸水為用神。一神兩用，必成大器，只等待時機來臨［大運］

頭兩柱係行返火土運，正印格行返火運，拿呢啲時間，必定以讀書為先。你又會問喇，喂又話玩音樂最好係傷官重既？呢個係正印格嚟架喎。印重之人，佢都會有一種自己自閉地去鑽研一種佢自己喜歡的東西，而睇報導，佢小時候好孤獨，冇乜朋友，而自己就好鍾意一個人去學音樂鑽研音樂，而父母也不是演勢或音樂世家來的。

其實好似林家謙的八字，也不是傷官重的，詳情可以睇返，只要行運就得架喇。

佢開始紅之時，應該係乙未運最後的兩年，大概係２０００年咁上下，當時係庚辰流年，及辛巳流年。因為王力宏喺乙未運後，就會行丙申丁酉二十年金運，有金去生水。所以氣已引動，當乙未運仍旺火土運，得去到最尾兩年行金之流年，流年之氣就會引動，而且咁啱嗰兩年係食傷制殺，所以在該大運最尾兩年得到了名氣及地位。

之後由２００２年至２０２１年，二十年的金運，為其大紅大紫之時間。分析其八字，有很多訊息可以看到，例如他原局火重，如引伸為做什麼工作合適，必定是和火有關係，火，唔通係消防？其實娛樂演勢也是屬火的，所以他會做一些火旺的事業，和他較有緣份。一行大運，揀啱事業，就即彈出了。

係咁讚佢，又話賤男？冷靜啲，而家分析囉。

時日月年

吉己癸丙

時巳巳辰

原局嚟講，財破印，本身就已經係會堆砌大話之人，咁如果搵食嚟講，冇問題的，但放在家庭都係咁，就唔係太好啦，連屋企人都呃。辰中有癸水，即係原局一早就收埋咗好多女人，不為人知。雖不知時辰，但天干掛上了一個正財，即係人前人後，營造出只有一個太太的樣子，呢種係表面嘢，而實際就有好多收埋的情人。

呢啲格局，如果係唔行運的窮鬼，咪有個老婆，但又成日瞞住個老婆去風花雪月之人，窮有窮玩窮風流。好似王某咁，有頭有面有錢，就自然會玩得更加離譜，不過我哋普羅大眾見唔到之嘛，而呢啲又係佢私事嚟，所以唔會無啦啦走去查佢啩。

時日月年 運

吉己癸丙 丙

時巳巳辰 申

其實一走金運，即係２００２—２０１１年，佢已經係咁啦，丙申入局，夾拱子水，除了辰中癸水係其他女人外，仲有拱起咗一啲不穩定的感情，可能就係佢哋圈中流行的炮友了。呢樣嘢，源源不絕的，咁佢又外型討好，自己口甜舌滑，當然也不乏有大量異性自動埋身吧，所以做成呢個量，一定唔細。

時日月年 運 年

吉己癸丙 丁 辛

時巳巳辰 酉 丑

而家行緊丁酉運尾喇，丁酉運係２０１２—２０２１，癸水最愛見辛金，而酉金即辛金，因為酉中便是辛金了。走呢個酉運，更是桃花大運，咁呢個時候又引動了夫妻宮，據維基記載，佢又好似係２０１３年結婚的。

因為係桃花運，要乘住佢上一個運玩女的氣勢，呢個運佢必定會繼續落去，唔會點修心養性架喇。

雖然私生活不檢點，仲有疫情，呢幾年行返金水流年，佢收入應該一點也沒有少到。

王某提出離婚的原因，是說想過單身生活。今年辛丑年，三合金局而引動夫妻宮，即感情有機會起變化。丑為比劫也為自己，因丑坐下之己土，己土為此八字之日元，丑中仲有辛癸，即食神生財，即係講到尾，想繼續搵女啫。。。

不過，萬物有時，一個人的好運也會有用完既時間。

佢咁啱走到廿年金運之尾聲，真係咁啱得咁橋，下一個大運，走入一柱重土之運。

時日月年 運 

吉己癸丙 戊 

時巳巳辰 戌

戊戌入局，地支辰戌相沖，去掉辰中癸水，戊土透干尅合癸水化火。癸水不能生存，呢十年佢好難捱。癸為財星，即所擁有的東西，會被劫財所奪去。不過佢呢二十年都搵夠啦，咪退休囉，搵唔到食，慢慢搣都夠過幾世啦。２０２２／２３，財星臨病地，之後一路走火之流年，最快去到２０２８年，可能事業上才再有少許起色。

雖然佢 六十幾歲時再走十幾年金水大運，不過到時年事而高，唔知有咩可以俾佢搞，但首先，要捱得過未來呢十年先，因為一柱戊戌忌神大運，呢十年，都幾難捱。

由其是佢做咗咁多錯事，佢之後冇運行衰到貼地，也沒有觀眾會再同情佢吧。