星期六命案（６） (Patreon)

有一日, Dr Lee打俾我, 佢話有嘢想問.

Dr Lee唔係醫生, 因為佢讀佢嗰科讀到phD, 所以有個Doctor的銜頭咁解.

佢當年三十出頭, 係一間可以稱得上係國際企業的公司裡面做, 但唔算行業龍頭, 職級算高, 喺一個部門裡面話晒事. (咁師傅當年都未夠三十)

我: 喂~

Dr Lee: 喂, 師傅, 有啲嘢想問, 我有個朋友, 佢話想唔撈, 我同佢傾過架喇, 我想佢過嚟幫我手.

我: 咁咪好囉, 有咩幫到手呀我?

Dr Lee:  我想你幫我睇下佢個八字, 同我夾唔夾.

我: 咁樣架咩? 又唔係結婚, 駛睇夾唔夾架?

Dr Lee: 唔係要咁睇架咩? 如果夾, 我加佢多啲人工, 撬佢過嚟.

我: 其實唔駛咁睇, 你俾你同佢個八字我丫, 我幫你諗掂佢.

Dr Lee: 好, 搵到資料再搵你.

*********************************************************************************

如是者, 過咗幾日, 佢又打嚟喇喎 (因為嗰陣, 仲未有whatsapp, 你話有幾耐丫)

Dr Lee: 師傅, 搵到晒了, 你抄低佢啦.

我: 好的

Dr Lee: 佢個出生日期, 同我個出生日期, 係XXXXXXXXXXXXXXXXXXX

我: 我的, 我起盤先.

(當年未有咁多排盤apps, 睇盤要自己人手起盤)

我: 搞掂. 咦, 你同佢, 相差一年咋喎.

Dr Lee: 係呀, 好啱傾. 佢network好強, 可以帶好多生意入嚟我公司.

我: 啊, 係呀? 拿其實係咁既, 攞晒你兩個八字, 唔係睇你兩個夾唔夾, 而係睇下, 你哋行運同唔同步, 同埋大家既性格夾唔夾到.

Dr Lee: 得架喇, 你話我知結果就得, 咁我睇下俾咩人工佢.

我: 就咁睇, 佢係行緊運既, 咦, 但你點攞佢時辰架?

 Dr Lee: 直接問佢囉, 哈哈.

我: ok, 佢係呢一兩年有啲阻滯, 但大運佢仲有排行. 佢人緣幾好, 桃花也旺. 應該同人溝通有一手.

Dr Lee: 梗係啦, 佢喺隔離大公司的top sales嚟, 渣住好多客, 佢老細忌才, 整緊佢, 佢冇癮, 咪想換下環境囉.

我: 啊, 咁都ok丫, 不過佢要下年先會好返啲, 咁呢半年你可以當人喺公司適應環境, 下年先同你跑單囉.

Dr Lee: 冇問題丫, 我相信佢能力.

我: 不過你下年開始走啲運, 麻麻哋. 因為一毎大運主十年, 所以你未來十年, 大部份時間, 都唔係咁順利. 會有破財, 尅父尅妻, 或者被人跣.

Dr Lee: 吓唔係丫嘛.

我: 我話聲你聽啫... 咦? 睇真啲先, 你老友個八字, 有少少問題, 因為佢地支有傷官尅官情況, 呢個人會有少少反骨, 同埋佢個野心都幾大, 雖然佢跑數叻, 但如你真係請佢, 唔好俾咁大權佢, 雖然我唔想咁講, 不過小心啲好.

Dr Lee: 明白, 不過我識咗佢都有四五年, 我確信佢係一個唔錯既人.

我: 好的, 咁你睇下點, 自己決定了.

Dr Lee:  知道架喇. 俾你戶口號碼我, 我轉頭叫我秘書過返數俾你.

我: 謝謝.

*********************************************************************************

如是者, 等多好耐都收唔到條數.

我自己都唔記得咗了.

又過咗一段時間....

Dr Lee好耐都冇搵我, 不過其實我哋係有common friend的.

有一日, 舊同事明仔搵我

明仔: 喂師傅, 近來點呀.

我: 咪又係咁

明仔: 咦喂, 爆單堅料你聽下丫, 我哋公司, Dr Lee冇做喇

我: 吓? 佢又搵到好路數, 冇聽佢講喎, 又冇打俾我. 咁而家邊個老細呀, 人好嘛?

明仔: 而家係Donald做老細呀

我: 哦? Donald係佢請入公司做架喎

明仔: 係呀, 你又知既? 佢請咗佢入嚟做佢副手, 佢撬晒人哋公司啲人過嚟, 又撬埋啲客過嚟, 好巴閉架.

我: 然後呢?

明仔: 搞到公司分晒山頭, 舊人同新人做嘢方法唔一樣, 好多是非.

我: 咁Dr Lee冇辧法咩?

明仔: 唉, 佢就慘啦.  Donald直接搵咗公司大老細陸先生, 因為Dr Lee介紹咗俾佢識, 話Donald係醒目仔會帶好多生意嚟俾佢, 咁之後又真係做到, 陸先生鍚晒佢, 好多嘢都唔經Dr Lee, 佢兩個直接傾架喇, 所以咪搞成咁囉.

我: 咁快既? 佢上次搵我而家, 年半咋喎.

明仔: Donald好勁架, 佢喺舊公司玩慣呢家嘢架啦, 過到嚟超晒班, 呢度太細, 之前風平浪靜, 冇乜經歷過辧公室政治, 而家全部中層管理, 都係Donald啲人嚟架喇, 啲舊人聲都冇得出, 一係唔好做囉.

我: 咁Dr Lee而家點呀? 佢又唔搵我.

明仔: 佢去咗第二間公司做, 自己做自己嘢, 冇下屬嗰啲囉.

我: 唉, 佢真係慘. 

明仔: Donald喺公司仲搵到條女添呀.

我: 吓, 佢結咗婚架喎.

明仔: 妖, 佢老婆喺美國, 鬼理到佢咩.

我: 乜咁架, 真係逼走個老死, 然後喺公司又食又拎喎.

明仔: 係呀, 條友賤男一枚, 我都遞咗信了, 而家有兩間公司俾咗offer我, 呀係喎, 師傅幫我占個卦, 睇下邊間好啲...

我: ......

＊按：星期六命案，是指師傅會在某一些星期六，會分享一些命例個案的故事給大家，並不是一件星期六會發生的命案。記著，只是故事，請勿對號入座。

—完—