擺風水的謬誤(二) (Patreon)

若干年前睇公仔箱的風水節目, 教人怎樣化窗外的動土煞.

動土煞即係, 你個窗口對住一個地盤, 有推土機呀, 挖土機呀, 鑽土車呀, 喺度翻轉緊個地下, 準備往後起樓用.

好, 大師教落, 用木的窗簾, 去化解呢個動土煞, 因為木尅土, 如遇土然, 以木尅之.

又係頭都暈呀.... 第一, 街外無啦啦動土, 係意料之外, 無啦啦要搵人裝過晒啲窗簾, 仲要係木造的, 唔容易呀, 或者你會話, 用錢搞掂咪得囉, 咁你都可以咁講的, 不過我就唔會了, 無啦啦要換過晒啲窗簾, 仲要動土煞完後, 係咪要還原?

第二, 大師忘記了一個最基本的風水理論, 風水係不宜相鬥的, 即係如遇一種五行的煞, 你只能化咗佢, 而不可以同佢相鬥. 鬥風水, 乃是大忌, 大師冇理由是不知道的.

如果遇上動土煞, 因為係街外巒頭上的東西, 最好的方法, 將個窗簾拉咗佢, 眼不見為乾淨, 咁就可以化咗佢. 如果咁啱窗口方的宮位, 為土重的位置, 再加上有相尅情況, 咁就要用相應的物件去化解咗佢, 而並不是走去同佢相門.

另外, 病位土, 二黑五黃也, 二黑為小病星, 五黃為大病星, 流年遇之, 最好制化得宜, 並不是去鬥佢. 如果你咁啱買咗棵泥種的植物放咗喺呢個位, 咁就真係恭喜你喇, 真正木尅土, 一定應病.

大師成日叫人放大葉植物架噃, 如果泥種的話, 咪又係木尅土, 可以想像一下, 一個星盤之中, 九粒星, 屬土的已佔三粒, 木的兩粒, 要令到佢有木尅土的情況, 係有幾咁容易, 放大葉植物簡直就係令到個病位現身, 有乜問題, 有時間之後再講下紫白訣, 就會清楚.

都唔知點出書講風水的謬誤, 真係好頭痛呀, 連五行大義都未搞得清, 不過世上只有最成功的風水大師, 出咗名, 口材好, 就算啲嘢求求其, 市場都當佢係啱架喇.

另外, 就係化病了, 很多師傅也會叫人放五帝錢, 六帝錢, 或十一帝錢.

呢三款嘢, 係要搵到由清朝順治帝, 康熙帝, 雍正帝, 乾隆帝, 嘉慶帝, 或再加埋道光帝的銅錢, 所組成的. 意思係, 呢幾個朝代, 係清朝最輝煌的朝代, 再加上大師或法師的加持, 除了化煞外, 仲可以辟邪咁話喎.

我都好似唔只一次講過, 用銅錢, 其實係因為銅錢外圓內方, 天合地合, 圓型為天, 中間個正方型窿的正方解地, 再加上六數主乾卦, 以土生金化病為用. 並唔是用來加持再辟邪的, 純講風水的話, 不涉鬼神, 所以唔駛加持什麼, 你放啱個流水擺設, 放啱個釣魚翁, 已經可以催到財, 也不用搵個法師幫你加持.

至於嗰六個皇帝係咪啱駛? 什麼清朝最興盛的朝代? 順治帝二十四五歲時已經駕崩, 嘉慶和道光時期, 清朝已經走向末落, 談不上什麼興盛, 最興盛的, 只有康雍乾三個年號, 而乾隆的末段也開始衰退, 所以不明解為何用呢個理由話要放呢六個皇帝的銅錢, 或許是一種噱頭吧. 而且有啲師傅用法係將帝錢放喺門口出面搵張地氈冚住, 不過純五行風水的話, 銅錢要放在室內, 才可與室內的飛星理氣交感, 才有佈風水的效果.