命理隨筆 - 歌星李幸倪約滿不(獲)續約事件簿 (Patreon)

早幾日，面書上彈咗一段娛樂新聞出嚟，話歌星李幸倪ＧＩＮ ＬＥＥ同環球唱片不再續約，如師傅冇記錯，環球唱片即係前身寶麗金，即譚Ｘ麟而家仍然係佢哋旗下歌手嗰間唱片公司，師傅讀書時都幾鍾意呢間嘢，因為有學友及黎明，但到而家，都冇乜好感，ＧＩＮ ＬＥＥ離開，主觀嚟講，好事一樁。

咁客觀地用命理去睇，又係咪好事呢？

時日月年 運 年

吉丁戊丁 壬 壬

時未申卯 子 寅

丁火申月，有傷官透干生財，呢個八字天生愛表演及唱歌，才華在此。因為傷官代表一個人的才華，透干即代表眾人皆見，我諗冇人唔同意佢唱功算不俗吧。

大運今年入壬子，壬水為正官，即係佢的工作，佢的上司，壬水本來合佢，但第一，壬水也來合年柱丁卯，唔排除呢個丁卯就是AＧＡ，因為先來合年柱，即係公司同AＧＡ繼約了，但壬水郤被戊土來尅，即變成傷官見官，又來合我。

呢個工作，對我來說，又愛又恨。

今年壬寅，原局戊申，同流年壬寅，天尅地沖，月柱係一個人的工作宮，天尅地沖即是有重大變化。ＧＩＮ ＬＥＥ同環球一直有長期的工作關係，一入呢個大運即時終止，都唔好話唔邪。

師傅唔知佢份約去到幾時完丫，不過就咁睇流月，新曆８月戊申，戊土再尅壬水，地支寅申又在沖，即係要過埋成個８月，等個申金尅完寅木，之後才會好才會重新出發。

以佢咁有才華，人氣又算高，其實去到邊間公司一樣可以發光發熱，會不過我反而認為，佢加盟細公司，甚至自己組公自己做，對佢更加有利，因為十年大運有傷官尅官之意，如簽另一間公司，都會發生與公司唔啱的情況，倒不如將佢轉化做，自己以身由身咁做音樂，會有更加有創意突破性的音樂創作，可以帶給大家，應該會更加令大家期待。