風水顏色學 (Patreon)

繼風水燈光學之後，又有風水顏色學。

即係，師傅，我買咗間屋，而家要裝修，我啲牆身應該用咩顏色呢？

我都唔記得之前有冇講過，首先用排除法先。

紅色最好唔好用，因為紅色會刺激你的眼晴，而且陽氣太盛，會令人身體出毛病，又或者脾氣暴燥，而且會令人精神緊張，所以呢隻色，最好唔好用喺牆身度，feature wall都係咁話。

另外，黑色啦，唔駛多解釋，我諗冇人咁癲，真係髹自己全屋個牆身都係黑色啩？唔駛解釋啦，風唔風水，都應該唔會有人咁做啩。

剩低的顏色組合，有邊啲係適合用喺牆身既呢？

好，有名師認為，係咁既：

寒命人，適合用青，綠，紅，橙，紫，暖色系；

熱命人，適合用白，金，銀，黑，灰，藍，冷色系；

平命人，百搭既，用乜色都可以，但都係用冷色好啲咁話；

如果成家人撈埋乜命都有，咁又話用中性顏色喎，即係米，啡，黃咁樣樣。

佢再補充一句，用錯色，會影响家中風水咁話。

咁其實，屋裡面的東西，係應該對應返屋裡面的理氣，而應用什麼顏色，定還是要配返個命格呢？

真係唔同人唔同師傅都有唔同答案。

至於我，其實我答親客，都係用白色或者米白色，如果想玩局部顏色牆，係會睇下嗰個位置，即係宮位，適唔適合你想用嗰隻色，嚟去定，嗰個位置可唔可以用特別指定顏色的。

例如，屋主想用黃色喺嗰一幅牆身，但嗰度咁啱係木旺的理氣，咁就不適宜用黃色了。

所以一個理論唔能夠用喺全部的事物身上，乜都只係睇寒熱命，而忽略間屋本身每個宮位的理氣，咁樣佈局，又係會出亂子，用錯顏色，會將屋裡面本來有問題的東西，加以放大，即係將佢唔好的東西，應咗出嚟，咁本來冇事，但因為個顏色用錯了，反而出事了。