日記~28/3/2021 ~ 監獄外圍/一份面包 (Patreon)

星期日  （熱/晴）俗稱大偉Day的星期日，早上唔知邊位做老細(看守的職員)，太多未見過啲職員啦！唔知係咪有少少感冒，冇胃口，早飯食咗小小，下午冇食粥，食咗兩份麵包便算了(其實每人只有一份，一份嘅意思即係半塊面包，食兩份係食多左，好在B仔通常攞多啲，老實半份包點夠飽?)。班Pantry佬迫晒喺房仔，真係好黑人憎，粗佬冇禮，人又多，好迫呀！又嘈，又扭到電視鬼咁大聲！尤其瘋峰好L煩，咩都唔識又要問，四十歲人啦！成個七、八歲小朋友咁！唔怪得佢咁討厭，成個Pantry冇人Like佢，冇人同佢講嘢。仲以為有排球玩，出到操場，轉個頭便返去了，沖沖下涼話有探訪，好期待的東西終於到了！入了結他歌書，都好，不過可惜本書唔岩，唔知妹妹有冇要求換呢？希望有啦！食晚飯時，囚友安爺被職員帶走了，發生了什麼事？出事了！今晚有籃球／足球比賽，唔通佢收外圍做粧比人篤背脊?