出獄前拉衫尾 (Patreon)

小弟在囚時，係會著住一件深藍色短袖內衣訓，因為係一張6呎長x2呎半闊x2呎高左右嘅玻璃纖維床，如果唔著衫，係會好熱同啜住啲肉。

赤柱監倉係門口對門口，雖然中間隔左條走廊及天井，約四米多距離，在門上小窗口也可以望見對面倉嘅囚友，佢地大部份喜歡光豬訓地下，因為囚室實在很熱，可能自己試過比曱甴係頭髮上爬來爬去(係荔枝角個陣），而係赤柱都經常見到曱甴走來走去，可能自己冇咁怕熱，所以都係穿住衣服訓床比較好。

明天就要放學出獄了，所以把所有可以帶走的物品收拾好，大約有兩大袋加一個結他，其餘可以比人的都比晒人地，例如洗頭水及皂液等。

如常十點關燈，如常開住貓仔（收音機）（必須要用耳筒收聽）邊聽邊訓，訓到半夜約，突然有嘢拉衫尾，就好似有人用手拉衫脚，扯了幾吓，作者成個人彈左起身，第一時間以為有老鼠想爬上床所以拉住我衫脚，借力爬上來，即刻起身揾吓四週圍，不過得個唔夠一百呎嘅地方，又冇雜物，當然揾唔到老鼠。因為曾經聽過老鼠會由厠所個度「捐」上來，就去睇吓，(因為要與廁同眠，習慣放幾片紙巾在廁所水上面，可以防止臭味由水衝上來)，風平浪靜，如果有老鼠跳入去，紙巾應該被水浸沒，紙巾依然無恙。而看看門下空隙，因為家人入了很多毛巾，舊的毛巾都用來抺地抺東西，而為了防止曱甴，也有用毛巾把門下空隙塞住，所以老鼠應該走唔到入來...

莫名其妙，當時收音機報時，清晨五點，即時想起，這些時份，靈界係最活躍，唔通大家相處左咁耐，同我道別？有靈異體質的朋友應該明白，這不是什麼實質証據，而係一份感覺，直接入腦的一種訊號，“再見“的感覺在腦中浮現！定神之後，繼續訓吧！由赤柱早上11點左右正式放學，感謝有十幾位好友接放學。