日記～2/2/2021 監獄的規矩 (Patreon)

晴 14°C -26°C 星期二 今日抽空肚血，所以無早飯食，照舊6:30am 起身，好快去到荔枝角指模房，又係一堆二堆文件處理。去到了瑪嘉烈都只係8:45（可能好近），等左一陣就可以抽血見護士講述病情及身體狀況，當然乘機指控懲教派藥派到亂七八糟，不定時食藥，於是護士叫我同醫生講，職員當然面色一變，護士問完等見醫生。 見到一位外藉女醫生，醫生係講純正廣東話，當醫生問有冇準時食藥？冇..... 醫生即刻好大聲咁講“你地點可以咁樣對啲病人”，我即時想笑出來。於是我只好照直講，因為唔夠藥，佢地miss左我個覆疹，所以有一日冇藥食。另外因為經常出出入入監獄，所以早上食唔到藥（原因係懲教規定，每日一次嘅藥會安排早上服用）；職員即時提出晚上食藥比較好，於是醫生換了一隻新藥比我及寫了醫生紙比我，我同時要求醫生比漱口水/抗真菌藥膏/類固醇藥膏，醫生即時話無問題。証明了一樣嘢，醫生所提出及交比我嘅藥，懲教必須遵守，我又學識了一樣監房秘術！原來懲教係可以攞快籌，所以好快就攞到藥，離開時係10:30am 等埋車用了廿分鐘，返到荔枝角只係11:00am 多啲...職員叫我攞返個飯食，都唔知係咪今朝留到而家呢？仲要我邊行邊食，一邊食一邊返去7R期數，因為佢地趕住交更。而石壁囚友阿肥都睇完醫生返來，屯門睇完返到來都係12:30，因為大家都可以用快籌，唔使等二至三粒鐘。 12:30 又係食包妹時間，有位新囚友ON很好，他分享自己的咖哩比大家食，這就是我喜歡到荔枝角的地方，飯已經好難食，如果有啲咖哩，食飯會開胃好多。下午無咩做，只係寫吓日記，同朋友傾吓計，講起某個地方，大家有啲小意見，於是就劃左地圖出來，大家就認同了。職員突然走過來，就話邊個劃地圖？係咪想逃獄？原來係獄中劃地圖係禁忌！又識多樣嘢！職員又同我地講吓獄中術語，“拋” “拍” “大衛Day” 等等。 晚上回到Single Cell 見到阿文（佢係非禮男童，本身係一位教師，有前科），佢自己本身有六呎高，廿六歲，靚仔大隻，最後判左“六隻”（六個月）原來阿文之前係赤柱！大家交換了囚號，有機會就通吓信。