爺爺的眼淚（靈異故事） (Patreon)

分亨兩個同爺爺有關的靈異經歷：

第一個經歷應該係1990年左右，爺爺係六十多歲身體健康情況下，心臟病發過身，當時係元朗博愛醫院後面一個簡陋地方，四條柱加一個頂，就係咁作一個靈堂用道教儀式出殯。由於爺爺係文革走難來到香港，而爺爺又係獨仔，爸爸又係獨仔，所以冇咩親戚係香港，儀式及親友都比較小。爺爺個官木都好簡單，係個頭部位置有個洞，用一塊玻璃蓋住比人瞻仰，只係睇到個樣。由於遺體係雪櫃攞出來，而當時係夏天，爺爺成塊面都有水點，由於係郊外，我突然見到有隻蟻係爺爺塊面行來行去，我冇問任何人，自己就好快咁攞開塊玻璃，幫爺爺趕走隻蟻，我清楚見到，爺爺好似流出眼淚咁，當我想望清楚時，家人好驚咁問我咩事，點解搞住爺爺，我都如實陳述，想趕走隻蟻，我只有放返好塊玻璃，繼續法事！

第二件事約2020年，事隔三十年，爺爺土葬後七年起骨再火化，骨灰同嫲嫲合放係和合石，平時拜祭都係由哥哥同爸爸去化寶，而我通常係點香燭放祭品，今次爸爸叫我同哥哥一齊去化寶啦！我一邊化寶，一邊細細聲叫爺爺收嘢啦！嫲嫲收嘢啦！我即時兩行眼淚不停咁流出來，當時我心境係好平靜，冇任何觸感，但兩行眼淚不停咁流，我自己都唔知咩原因，直到化完寶之後，返到靈位前，家人見到我眼淚不停咁流都問我咩事，我都係答唔知道，家人只有不停比紙巾我，直到我地離開，眼淚先開始慢慢停落來，到底發生咩事，會有咁嘅情況，到底係出殯時嘅延續，定係知道我將要入學（入獄）而借我眼睛流淚，真係無從稽考。