日記~16/2/2021 ~ 監獄內第一份"願榮光"結他譜 (Patreon)

星期二  晴 21°C年初五，一早起身就有心理準備，有大堆垃圾及清潔甚污糟嘅廁所。食過早飯，阿希手足今日正式落山 (去到真正所派的工作地方)，唔知去邊個期數？工作開始，共有七大袋垃圾，好在都係零食膠袋或食品空盒，只係多唔重，而廁所也只不過係煙頭、煙灰的臭味，而無塞到！比想像中好。阿軒有幫手，正如初二阿賢也有幫手一樣！得到囚友認同真係好開心。（嘉豪好快返來，真係好擔心佢）工作完畢（大圍洗樓清潔完）返到活動室見到一張歌譜「願榮光歸香港」第一個反應—禁歌? (係由囚友賢仔比我) 即刻好好保管。我寫信時間阿發想要什麼抗爭Poster，順便同阿發講歌譜，同阿賢一齊研究寫上音譜（1,2,3）再加入阿軒，兩個結他一齊唱，真係好多畫面！其實佢地2019時，係監獄入面，佢地話一直布睇新聞，都明白發生什麼事，雖然佢地係黑社會，但都係一直企係我地個邊。最低限度係佢地唔敢做的，而我地做到。(我諗應該係同狗大打出手) 可能是我幸運，遇到一群年青而有理想的黑社會，所以不但無比佢地欺負，反而相處和諧融洽。這是我的幸運!得知阿希去咗Pantry（同嘉豪位置一樣），我相信阿希比嘉豪硬淨好多！晚膳都撞到阿希，見佢都冇大問題，心都安樂。明天要出荔枝角覆診，剛好同阿肥同鴻仔一樣。嘉豪18號上Court，希望喺荔枝角見到佢啦！祝願每位手足平安!PS: 唔知係咪上天安排，剛巧日記寫到"願榮光歸香港"呢首將會可能成的禁歌，我無論在石壁定赤柱，一有機會彈結他，必唱榮光，而且有很多其他非手足囚友一齊唱。