日記~18/2/2021 ~ 胡椒噴霧傷害眼角膜 (Patreon)

星期四  晴

昨晚隔籬房班咸濕仔買咸書睇（喺到講邊個已經殘曬，又生過仔。監獄就是如此，用煙同B 仔貫咸書）今朝比較清涼，昨晚成晚凍醒！

早上係F3(荔枝角舊翼層數) 食完早飯就過去新翼，水路好多人去咗覆診，包括鴻仔，只得返塘福個位同四、五個大洲老桐 (喜靈洲吸毒者)。塘福個位朋友之前也在石壁流倉受過，不久鴻仔及阿肥分別返到7R (水路的期數名稱)。到12:30左右就到我同輝（塘福位囚友）去覆診。我今日去明愛眼科`覆診，2:30準時到，當然喺指摸房又有一堆繁複手續及搜身啦！今日乜都遲，醫生遲咗見，攞藥冇快籌，回荔枝角車又遲，6:30PM先返到荔枝角，又一堆手續差不多8:00pm先返倉，我啲藥又三吹四請都攞唔到來！

在醫院期間，阿Sir都有好多嘢問我，唔知點解對我件案件咁有興趣？好在都健談，唔係就悶死，喺醫院成六點先走得。咩都遲曬，指摸房完成已經八點。六點見到醫官，提佢我要食夜藥，話一陣搞，搞到八點，我再話食夜藥，再話返倉先，一陣攞上去。我攞咗一份咖哩餐食，返倉食完，等咗一陣派藥，又話冇我隻藥，又要搵，搵到十點熄燈仲未有就再問阿Sir，幫我Call咗醫官上來，就話藥房關咗門。我話冇藥就唔該幫我打999車我去瑪嘉烈急症室攞藥，之後最終咪攞到藥上來。懲教就是這樣，唔做嘢博你唔好嘈，但只要知道佢地死穴，就可以同佢地玩。

喺十點同醫官對話才知道我明天返回石壁，咁快（我心想），死啦我啲洗頭水、皂液仲係7R期數個架到，仲有內褲，阿Sir話攞到機會好微，只好瞓覺明天再算，一日發生太多事！

PS: 因為眼睛被胡椒噴霧傷了很多次，所以角膜受損，眼睛看出來非常模糊，醫生話要等角膜傷口服完後，睇吓要唔要做人工角膜移值手術。